Parlamentarionan di AVP a dialoga cu studiantenan di Koninkrijkszaken tocante e desafionan di Aruba

ORANJESTAD (AAN):  Fraccion di AVP a ricibi cu gran placer un grupo di 38 persona, consistiendo di 27 studiante di Haagse Hogeschool, 7 studiante di Universidad di Aruba y 4 guia,

como parti di e bishita di facultad Minor Koninkrijkszaken organisa pa Haagse Hogeschool den colaboracion cu Universidad di Aruba. E bishita a duna un oportunidad valioso pa intercambia idea y trata temanan relevante pa futuro di Reino Hulandes y, mas specificamente, pa Aruba.

Durante e encuentro, e studiantenan a presenta diferente pregunta riba topico manera seguridad den Caribe, un tema cu ta tuma mas importancia pa motibo di desaroyo regional y riesgo natural. E grupo tambe a mustra gran interes den e dependencia di turismo, sector principal di nos economia, y manera con Aruba por diversifica y fortalece su base economico.

Un otro punto clave tabata e relacion cu Hulanda, incluyendo discusion rond di Landspakket Aruba, Rijkswet y situacion di interes. E studiantenan a busca comprension mas profundo tocante e structura politico-administrativo den Reino, y Fraccion di AVP, representante pa parlamentarionan Otami Thomasia, Stephany Sevinger y Jennifer Arends-Reyes, a ofrece splicacion amplio riba nan vision y principio.

E parlamentarionan a contesta tur pregunta cu transparencia, respet y compromiso. Temanan manera idioma di instruccion y e problematica continuo di refugiado, particularmente relaciona cu Venezuela, tambe tabatin un papel importante den e dialogo.

AVP ta satisfecho cu e nivel di interes, preparacion y nivel di e discusion cu e studiantenan a trece. Nan lo sigui stimula intercambio academico cu por fortalece conocemento, comprension mutuo y un Reino mas solido y husto pa tur ciudadano.