Parce cu tin mas boto perdi riba lama
*Diez naufrago rescata via di Helicopter
WILLEMSTAD: Biento ta suplando basta e dianan aki rond di islanan ABC. Consecuencia ta cu lama grandi ta basta bruto.
Diamars den oranan di mainta, Centro di Operacion Maritimo (Centro MOC) di Wardacosta di Caribe Hulandes, a ricibi un notificacion urgente, cu e momento ey tin un of mas boto ta perdi riba lama.
E informe ta splica cu e boto (of botonan) a sali for di costa di Venezuela y tabata rumbo pa Curaçao, y cu nan tin varios persona indocumenta abordo.
Despues di a ricibi e notificacion aki, Centro MOC mesora a duna ordo pa e Helicopter di Wardacosta lanta vuelo, y a cuminza prepara e avion Dash-8 di Wardacosta tambe pa cuminza busca riba lama zuid di Curaçao.
Esaki a wordo haci tambe, y personal abordo di Helicopter y e Avion a keda vigila movimento riba lama.
Durante e buskeda, un contact a worde detecta riba Marine Radar door di personal di MOC. Mesora nan a duna e posibel localizacion na e avion Dash-8, cu a move mesora den e area ey.
E funcionarionan den e avion Dash-8 a core raporta ora nan ta bulando den e area, cu mas bien ta un Boto a bolter, y cu tin varios persona ta drief door di wanta na e kiel di e Boto.
Cu e detaye y localizacion nobo aki di e avion Dash-8, mesora Centro MOC a cuminza manda e Helicopter di Wardacosta, y a saca dos speedboat rapido Metal Shark rumbo pa e sector ey tambe.
E bon noticia ta cu den oranan di merdia, en total 10 persona a wordo rescata for di e lama bruto aki y a wordo hisa abordo di e Helicopter. Entre nan tin 4 hende femenino, y 6 hende masculino. Nan tur ta procedente di Venezuela.
Nan a core suplica personal di Wardacosta den Helicopter pa sigui busca, como cu tin varios persona mas perdi riba lama. Despues cu tur e personanan aki a wordo rescata, e Helicopter a bula rumbo pa Aeropuerto di Hato na Curaçao. Aki tabatey presente Ambulance, personal di Polis, Marechaussee, pa asina yuda den e aspecto aki, manera por mira riba e potret.
Despues di esey, e avion Dash-8 hunto cu Helicopter y personal tras di radar a keda ta monitor. Te na ciere di edicion aki a haya sa cu e buskeda ainda ta sigui riba lama.
