Parlamentarionan a keda impresiona con St. Franciscus College ta preparando pa Dia di Betico

ORANJESTAD (AAN): E siman aki ta Dia di Betico, y desde varios aña, Evelyn Wever-Croes y Edgard Vrolijk ta bishita scolnan na Aruba en conexion cu e dia aki.

Pa e fecha special aki, scolnan na Aruba ta prepara alumnonan dunando informacion di e bida y logro di e gran politico, lider, estadista y Libertador Arubiano, señor Gilberto François ‘Betico’ Croes.

   Diamars mainta Parlamentarionan Wever-Croes y Vrolijk a cuminsa e bishitanan na St. Franciscus College na Playa. E parlamentarionan a wordo ricibi pa Cabesante juffr. Nadine Kirindongo y a wordo dirigi na klasnan 1 y 6 na unda cu nan a keda hopi impresiona con hopi interes e muchanan tin pa conoce mas di Betico. Evelyn Wever-Croes a conta nan un tiki mas di e storia di nos Libertador Betico Croes, e interes cu e muchanan tin desde un edad jong, pa sa e storia di e gran Arubiano cu a logra Status Aparte pa Aruba, ta grandi.

   Mi ta gradici St. Franciscus College, cabesante juffr Nadine y tur docente y alumnonan pa e mainta ameno. Di curason mi ta gradici e docentenan pa guia e muchanan riba e importancia di carga den nan curason e amor cu Betico tabatin pa Aruba”, Evelyn Wever-Croes a expresa.