ORANJESTAD (AAN): Diabierna ultimo, manera tur diabierna, tabata tin ambiente pa adultonan mayornan na Djiespie‘s Place acompaña pa musica di Robert Thiel y su grupo.
Aunke awendia e ambiente aki ta atrae mas edad na Djiespie’s Place.
Parlamentario Setty Yarzagaray di fraccion di MEP tabata tin e honor di acompaña Minister Endy Croes como representante di Gobierno di Aruba pa entrega un reconocemento na e gran famia di Djiespie. Esaki un par di siman despues cu Djiespie’s Place y famia a celebra nan 35 aña di aniversario.
Riba e fecha aki lamentablemente Setty y famia tabata di vakantie den exterior un par di dia y alabes Minister Endy Croes tambe. Pero no kier keda sin reconoce e famia Franken cu e gran logro cu e 35 aña di existencia aki mirando e retonan cu nan tabata tin den caya grandi pero ademas reconoce nan pa ta un lugar unda adultonan mayor y hobennan awendia ta bin hunto pa pasa momentonan ameno den compania di famia.
Parlamentario Setty Yarzagaray tambe kier a uni na Gobierno di Aruba pa felicita su gran famia Franken-Geerman pa tur nan trabou y dedicacion pa tanto purba trece ambiente den caya di Oranjestad pero tambe di ta un lugar unda nos grandinan por tin e oportunidad tur diabierna pa sali for nan ambiente di cas den un ambiente musical.
Felicitacion alabes na Lucia Rasmijn cu a cuminsa traha cu Djiespie’s Place desde e prome dia. Tambe ta felicita y gradici tur grupo musical y musiconan (manera Etty Topenberg def.) cu a cuminsa y a sigui cu e tradicion aki dedica na nos grandinan.
Parlamentario Yarzagaray ta admira sra. Chila Franken y Rita Geerman cu practicamente ta baila casi henter diabierna anochi cu ta nan dia di gosa despues di dianan cu trabou duro. Pabien na e gran famia cu ta yega na Djispie’s Place cu diabierna pa sostene e gran famia di Djiespie’s!
