Vocero Robby Rosel a confirma:
ORANJESTAD (AAN): Un luna pasa, DIARIO a raporta riba e decision di City Inspector cu a dicidi pronto nan lo cuminza haci un control, y tur a base di monton di keho y reclamo cu nan ta haya via telefon, y tambe via e plataforma di Fixi.aw specialmente di ciudadanonan cu ta bibando den zona residencial, y tin un “garashi” pa drecha auto of motorcycle den nan bario.
Debi na esaki ta haya holor di azeta, holor di fliet di verf, y henter dia, y hasta anochi cu marduga ta revv motor fuertemente strobando muchanan chikito di drumi.
A bin sali na cla, cu Bureau City Inspector ta acumulando adresnan cu nan ta ricibiendo di pueblo, di e tipo di garashi aki cu ta operando y ta un dolor di cabez pa henter vecindario.
Vocero Robby Rosel di Bureau BCI, a bisa cu ora di haya adresnan, lo planea bishita di e.o. City Inspector hunto cu demas autoridad, incluyendo Departamento di DNM, y otronan por acudi pa hunto controla e garashinan aki.
Te cu awor, Bureau City Inspector a ricibi adres di 37 garashi, y nan ta poniendo esakinan riba lista y fecha pa futuro bishita di control.
Djis laga auto pafo riba acera: Algo cu a bin ta ricibiendo tambe hopi ta reclamo cu varios doño di e garashinan ‘ilegal’ aki den zonanan residencial, tin e mal costumber di djis laga autonan daña of casi skelet riba caminda, acera, of pida mondi banda di e cas.
Segun Rosel, ta haci un suplica na esnan cu tin garashi y ta gusta haci esaki di laga autonan benta pafo riba caya of riba acera, pa stop di haci esey y pa rapidamente kita e autonan aki di eynan.
Corda bon cu caminda publico no ta di bo, y bo no por para autonan of wacharaca riba dje, tanten cu nan no tin un plachi di number poni riba nan, of aseguro valido.
Un suplica ta bay na cada uno di e personanan cu ta haci esaki pa cumpli cu rekesitonan stipula pa ley.
Esnan cu tin garashi, tin di corda cu bo mester tin bo vergunning kiermen cu bo tin derecho di tin un garashi pa bo por drecha auto. Bo no tin esakinan, tene cuenta cu di biaha nam ta duna bo un multa pa esaki. Pasobra nos a papia hopi, nos a trece hopi mensahe p’adilanti, pero e no ta yega na oido di ningun.
