Ta stroba e homber chikito pa haya un cas pagabel pa yuda e homber rico cu inversion
ORANJESTAD (AAN): Tratamento di Presupuesto 2025 a sigui y Minister Wever a presenta un Nota di Cambio cu ta kita e 17 miyon florin cu ex Minister Maduro a destina pa un fiansa pa FCCA por cuminsa traha 100 cas pa 200 cas. Esaki ta hopi lamentabel ya cu FCCA tin un lista di espera di mas di 3700 peticion pa cas social.
Tur investigacion ta haci y FCCA ta cla pa traha cas pagabel
Segun Minister Wever a haci e cambio aki pasobra mester bin un investigacion mas profundo y pa esaki mester bolbe reuni cu FCCA. Parlamentario Maduro ta haya esaki un excusa fofo di Wever, ya cu tur investigacion a wordo haci caba y na varios ocasion ex Minister Maduro di Finansa a reuni cu FCCA cu a duna presentacion caba cu ta ilustra e necesidad grandi cu tin pa cas social. FCCA ya tin tur plan cla y hasta tereno caba pa traha e casnan, ta e placa na interes barata ta locual nan tin mester pa por traha e casnan pagabel pa comunidad.
Ta stroba e homber chikito pa haya un cas pagabel pa yuda e homber rico cu inversion
Di un banda Minister Wever ta kita e 17 miyon di FCCA y ta stroba e homber chikito pa yega na un cas pagabel. Di otro banda e Minister ta subi e potchi di inversion cu 30 miyon florin pa asina yuda e homber rico pa e por gana mas placa. Esaki ta lamentabel ya cu net sr. Wever cu a critica e surplus bisando “cu ta gaba cu surplus, pero e frigidaire di e homber chikito ta bashi”, awo ta laga e homber chikito keda cu frigidaire bashi ya cu e ta kita tambe e 2,7 miyon florin pa FCCA por baha huur y yuda e homber chikito di berdad.
