Algo pa Departamento di Labor investiga:
ORANJESTAD (AAN): Matutino DIARIO tin entendi cu hopi trahador di e sector cu tin di haber cu turismo, en general, nunca ta haya e dianan di Semana Santa liber, y tampoco ta cobra overtime.
Segun un dama cu ta traha den dicho sector a comenta cu e managernan di e empresanan aki nan punto di bista ta, cu nan ta dianan normal den siman, y nan no ta considera cu nan ta dianan liber paga, manera e dianan nacional, por ehemplo, of Pasco di Nacemento.
Kiermen Diabierna Santo ni Diadomingo di Resureccion nan ta wordo mira como dianan normal di trabao. Pues, no ta husto y menos ainda cu e trahadornan concerni ta traha mas cu ocho ora pa dia, y segun e volumen di cliente ta den algun area, por sali hasta mas laat sin pago extra.
No ta algo pa mira na simple bista. E ta un abuso y ta straño cu Departamento di Labor no ta cay aden, ohala e Minister nobo di Labor por pone atencion na e asunto aki.
Hopi di e trahadornan aki ta gana salario minimo y no ta ricibi ningun sorto di compensacion pa nan esfuerzo. Pues, cu tin abuso laboral na Aruba parce cu si tin. Pa colmo, e trahadornan di cierto companianan cu ta bay e industria di turismo, ta sugeri nan trahadornan pa no afilia na un sindicato.
