ORANJESTAD (AAN): Desde Diabierna 28 di Maart 2025, e isla di Aruba ta den man di gobernantenan nobo.
Uni di nan ta mr. Wendrick Cicilia, kende ta encarga cu e cartera di Turismo, Labor, y Transporte grandi. Durante su prome reunion como Ministro den Parlamento, el a bisa cu ta un placer y honor pa ta para den Parlamento, y cu awe comunidad por respira un aire fresco di cambio. E ta haya un orguyo di ta forma parti di e aire fresco di cambio aki di comunidad a experiencia y ta bay experiencia.
Segun Ministro Cicilia, e meta di Gobierno aki ta pa inverti den capacidad di nos hendenan, pa nan participa den e bida economico. Pa nan tin habilidad pa por persigui nan soño, upgrade nan mes, inverti den nan bida, y esey ta e meta pa comunidad.
Programa di gobernacion ta contene esaki, pa eleva experiencia di bida pa nos hendenan. Tur decision cu nan lo bay tuma, ta inclui con pa eleva y hisa poder di compra di nos hendenan.
El a splica cu nan a cuminsa un etapa nobo den gobernacion di Pais Aruba. E momento ta awor pa decisionnan diferente, cu perspectiva nobo, yen energia positivo y amor pa Aruba worde refleha den cada decision politico cu Gobierno nobo aki ta tuma na beneficio di Comunidad.
“Aruba, danki pa confia mi cu un responsabilidad asina bunita,” Ministro Cicilia cu yen di animo a indica.
