ORANJESTAD (AAN): Parlamentario Xiomara Maduro ta felicita Biblioteca Nacional pa nan 75 aniversario y
ta gradici pa e buki conmemorativo “Capital Humano entre buki y arte” compila pa sra. Maria Teresa Madariaga pa e aniversario special aki.
Biblioteca Nacional a cumpli 75 aña y pa e ocasion special aki Maria Teresa Madariaga a percura pa un bunita buki conmemorativo titula “Capital Humano entre buki y arte,” den cual ta expone obranan di arte y literatura cu ta forma parti di e coleccion di Biblioteca Nacional.
Diahuebs ultimo Parlamentario Xiomara Maduro tabata tey na Biblioteca Nacional pa asina felicita su directora, staff y personal, y tambe pa gradici sra. Maria Teresa Madariaga pa e bunita compilacion cu ta contene obra di arte di mas di 40 artista local.
“Manera Maria Teresa a expresa den su discurso, ta hopi aña e obranan aki a warda pa cuater muraya di Biblioteca Nacional pa nan expone, educa y inspira nos Pueblo cu nan esencia. Masha danki na cada un di e artistanan cu ta deleita nos cu nan talento y obranan cu awe ta forma parti di nos coleccion nacional di arte meymey di tur e bukinan na Biblioteca Nacional,” ta palabranan di gratitud expresa pa Parlamentario Xiomara Maduro.
