Directie Natuur en Milieu:
ORANJESTAD (AAN): E calco aki su nomber cientifico ta Lobatus raninus, na Ingles e yama ‘hawk-wing conch’. E ta un sorto di calco di tamaño grandi, e ta midi ongever 13 centimeter largo. Su casca ta duro y diki y ta color maron (poco biña) cu manchanan blanco riba dje. E parti paden di e boca ta poco ros, crème of blanco. E calco aki ta biba den lama Caribe y ta gusta biba den awa menos hundo unda tin yerba di lama. Mescos cu e otro calconan den e mesun famia, e calco aki ta come yerba, esaki kiermen cu e ta herbivoro.
Cientificonan a studia e relacion entre e calconan den e famia Strombidae pa compronde con nan ta liga na otro. Un estudio na 2005 a uza e caracteristicanan fisico pa crea un herarkia di descendencia. Un otro estudio na 2006 a uza e genenan pa haya sa mas di nan relacion genetico.
Originalmente, hopi di e calconan aki tabata clasifica bou di e genero Strombus, pero estudionan mas recien a cambia nan clasificacion, elevando algun di nan na nivel di un genero nobo, manera Lobatus.
Aunke cu e nombernan a cambia asina mes nan ta keda proteha pa nos leynan local y esun internacional, CITES.
Ta recorda tur bishitante cu no ta permiti pa hiba ningun casca di calco den exterior. Na frontera tin control rigido pa cu esaki.
