Parlamentario Wever-Croes ta manda palabra di profundo condolencia y forsa na tur fiel Catolico

ORANJESTAD (AAN): Dialuna ultimo a lanta cu e tristo noticia cu Papa Francisco a fayece.

Parlamentario Evelyn Wever-Croes di MEP ta manda palabra di profundo condolencia y forsa na tur fiel catolico rond mundo pero specialmente aki na Aruba.

  Papa Francisco tabata un líder carismatico cu a duna bos na esnan cu no tabata tin bos. E tabata un lider den amor y den compasion. Parlamentario Wever-Croes a indica cu 6 aña pasa e tabata tin e privilegio di tabata tin e audiencia cu Papa Francisco na Vaticano, na unda cu el a cont’e di nos Virgen di Alto Vista, y a pidi’e un bendicion special pa Aruba di cual el a duna tambe.

   “Pa basta tempo caba tabata conoci cu Papa Francisco tabata lucha cu su salud. Un dia prome cu el a fayece, el a sali pa duna mundo henter un “te despues”. Semper el a pidi pa resa p’e. P’esey ban uni den oracion y resa pa Dios tum’e den su reino pa asina e por sosega na paz. Y cu Dios por guia e iglesia catolico durante e periodo aki di transicion” Parlamentario Wever-Croes a expresa.