ORANJESTAD (AAN)—Otro tema cu Parlamentario Hendrik Tevreden di MEP, a toca den conferencia di prensa,
ta un riba cual e ta enfocando desde 2018, ora cu el a presenta un mocion den Staten. E tema aki ta e necesidad di crea “centronan di cuido di mucha subsidia pa gobierno”, y el a splica tocante e punto aki y su importancia.
“Mas y mas nos ta bishitando casnan, y nos ta mira cu tin un grupo hopi grandi di mama soltero, cu 47% ta entre menor di edad y 24 aña. E datonan aki ta danki na mi colega Setty Yarzagaray. E grupo aki ta uno cu ta creciendo. Kico mi kiermen cu esey? Un mama soltero tin mas preocupacion y dificultad pa por lanta su yiunan, si nan no ta haya e apoyo necesario”, e parlamentario a bisa.
El a agrega cu normalmente den un famia tata y mama ta apoya otro, y tin e social net di welo y wela y ruman cu tambe ta apoya, pero por mira den e cambio e netnan social aki, hopi biaha ta cay afo, y e famia so ta keda como punto central, y den 47% di e casonan e tata tambe ta cay afo.
E Parlamentario a duna di conoce cu fraccion di MEP tin e plan pa apoya e grupo aki en special y ora ta papia di apoya, nan kiermen institui Centronan di Cuido di Mucha subsidia pa gobierno, pa asina e mama soltero por haya un chens, na un forma pagable, pa pone su yiu den un lugar safe, unda cu por haya guia, formacion y unda cu e ta wordo prepara pa e bay den e transicion di Kleuter pa Scol Basico. Un mucha di scol basico, por ehemplo, e por wordo fortifica pa haci su lesnan miho, haya bijles, etc., pa asina den e totalidad nan por ta mas fuerte pa e retonan cu nan tin nan dilanti como mucha.
Tevreden ta kere cu e implementacion di algo asina aki, lo duna beneficio y fruto tanto na e yiu como e mama. “E mama, e ora ey ta haya espacio pa concentra riba su educacion, haci cursonan, upgrade su mes, pero tambe mester por crea e parti di sector laboral unda cu e por drenta, si acaso e no tabata trahando, pa via cu e ta keda na cas cu un of dos yiu, wak pa nan. E ta haya chens pa drenta den e sector laboral pa asina yuda su famia bay mas dilanti”, Parlamentario Tevreden a señala.
