Parlamentario Shailiny Tromp-Lee a experencia bunita celebracionnan relaciona cu Dia di Bandera na Corsou

Tambe n show impactante pa celebra Dia di Emancipacion 2025

ORANJESTAD (AAN):  Cu gran honor y alegria, Parlamentario Shailiny Tromp-Lee a realisa un bishita oficial na Corsou  durante e dianan 1 y 2 di juli 2025, representando Fraccion di Movimiento Electoral di Pueblo (MEP) y formando parti di e delegacion di Aruba. E bishita tabata pa asisti na actividadnan importante relaciona cu Dia di Emancipacion y Dia di Bandera, dos fecha fundamental den historia y cultura di nan pais.

Durante e bishita, mi a asisti na e ceremonia di Baha Bandera cu a tuma luga na Plaza Brion dia 1 di juli 2025. Un acto cu ta simbolisa nan orguyo patriotico y nan compromiso pa nan identidad como pueblo. E ceremonia a keda finalisa cu un procesion simbolico cu a crusa e brug pa yega na Fort Amsterdam, caminda e Ceremonia Oficial di Dia di Emancipacion a tuma luga. E bahamento di bandera sigur tabata un actividad hopi bunita yena cu emocion y respet.

E anochi den Fort Amsterdam sigur tabata impactante. Un despliegue di talento, creatividad, historia dunando tambu un atencion hopi special y caminda a reconoce diferente baluarte cu a mantene e historia y herencia musical aki bibo y den un desaroyo constante. Cu e celebracion di Dia di Emancipacion, Gobierno di Corsou a conmemora e dia cu nan antepasadonan a sali for di opresion y a  reclama nan derecho humano. E celebracion aki no solamente a duna atencion na e logro di liberacion, pero tambe pa enfatisa e principio pa sigui traha na un Corsou cu ta husto, inclusivo y funda riba igualdad pa tur hende.

E siguiente dia, 2 di juli, mi tabata presente na e reunion solemn di parlamento y a participa na e acto di ceremonia oficial di Dia di Bandera. Un mainta dedica na amor y respet pa nan bandera y tambe na nan historia y cultura. Un mainta completo caminda a rindi honor na nan himno y bandera. Mas cu claro a para keto tambe na e importancia di e nificacion di un di e simbolo di union y  identidad mas importante di nan pais. Un mainta hopi bunita yena cu baile, canto, musica y caminda a reconoce personanan pa nan actonan meritorio y a demostra amor pa nan pais.

 Un reconocemento sigur na su lugar pasobra ta danki na e personanan aki nan por sigui crea un Corsou mas fuerte y prospero pa nan pueblo y futuro generacion. Ta personanan cu sin ningun interes personal a of ainda ta aporta grandemente na desaroyo di nan pais. Alabes durante e mainta aki nan e duna un reconocemento na mi tata Ramon Lee cual sigur ta keda aprecia masha pa su persona y famia completo. 

Mi ta gradici sinceramente pa e ricibimento caluroso y e tremendo trato ricibi durante mi bishita. Mi a gosa hopi di tur celebracion y sigur tabata un honor di por a celebra hunto cu nan nan Dia Nacional y e Dia di Emancipacion, un recordatorio di e lucha pa libertad y husticia cu nan antepasado a haci.