Parlamentario Ricky Hoek ta indica cu e no a kibra ningun regla di parkeo

AruParking a pone sticker robez

ORANJESTAD (AAN): Pa algun aña caba, ta conoci cu e espacio di parkinglot net otro banda di caminda dilanti Parlamento, tin espacio di staciona auto pa miembronan di Parlamento.

   Despues un biaha mas, na 29 september 2021 a sali den tur prensa cu 20 parkeervak lo keda asigna na e parlamentarionan. E espacionan di parkeo aki lo ta den e parkeerplaats dilanti di Renaissance Marketplace.

   Sinembargo, e parkeonan asigna na e parlamentarionan a keda ser usa pa tur automobilista cu yega na e lugar aki, y no ta respeta e borchinan cu tin poni eynan.

   Segun Parlamentario Ricky Hoek, Diabierna atardi dia 7 october 2022 un website local a bay live y a sorprende dos otro Parlamentario saliendo for di trabao cu preguntanan encuanto parkeo.   

   Loke ta lamentable ta e hecho cu e reportero di e website a duna informacion personal di Parlamentario Hoek, y di su vehiculo, sin worry cu respet pa privacidad, y cuestiona cu Hoek a kibra regla di parkeo.  Por ultimo ta duna informacion incorecto tocante di parkeo den ‘cura’ di parlamento.

   Hoek a agrega, cu pa crea sensacion y conmocion den pueblo, e website a core filma mi auto, e number di su auto, menciona mi nomber y solamente lesa e horario cu ta para riba e sticker, sin menciona e fecha corecto.  Di e manera aki insinuando cu mi a haya un sticker debi cu mi a para banda di Presidente di Parlamento di Aruba su espacio di parkeo.  Tambe e reportero ta indica cu parlamentarionan tin un badge di cual por ser uza pa nan para paden den ‘cura’ di edificio di Parlamento di Aruba si no tin espacio dilanti.

   Esaki ta totalmente incorecto. Parlamentarionan por parkeer solamente na e lugarnan asigna cu borchi of sino despues di 4’or y mey di atardi por drenta cu badge pa parkeer paden. E motibo pakico mi tabata para na e lugar caminda e website a bin filma mi auto, ta pasobra ora mi a yega parlamento 2’or di merdia pa atende un reunion importante, un bes mes TUR parkeo di parlamentarionan tabata yen cu autonan cu no tin permiso pa para tras di e borchi di parlamentario.

  Loke e website tampoco sa, ta cu mi persona tin 2 siman caba ta dialogando cu Minister Ursell Arends riba e asunto di parkeo pa parlamentarionan y cu te ainda ta den tramite di yega na un solucion concreto.

   Hoek a finaliza bisando: “Finalisando mi ta subraya cu mi no tabata mal staciona y tampoco a kibra regla di parkeo.”