ORANJESTAD (AAN): Esnan encarga cu e proyecto di ‘Hunto Grandi Grandi Hunto’ ta invita pa luna yen na Kapel di Alto Vista.
Di e forma ey, e schedule di actividad luna di adulto mayor 2022 di Hunto Grandi Grandi Hunto (HGGH) ta publica y ta on! HGGH ta un proyecto di Fundacion Movimento ta Bida.
Un di actividadnan cu tambe a cay na agrado aña pasa, tabata Luna Yen na Alto Vista. E aña aki HGGH ta bolbe ripiti'e!
DIARIO a compronde cu Diahuebs 13 di October pa 7’or un biaha mas nan ta topa pariba di kapel di Alto Vista. E aña aki e organizacion di pensionado OPPA lo join cu mas miembro. Pues e anochi lo bira mas gezellig!
Aña pasa nos a pasa zuiver! E aña aki ta priminti mas zuiver ainda! Luna a priminti cu e aña aki si e lo ta presente. Pues invitacion ta pa 13 di october di 7’or pa 10’or.
Ta pidi tur tur hende encarecidamente pa bin cu propio stoel super comodo, propio snacks y drinks. Pa asina por diverti trankil y relaha di algun ora di Luna Yen.
Eric Rincones y amigonan lo percura pa e parti musical. Canta hunto sigur Eric & friends ta desea. Darryl Everon y Jeremy Maduro di Asociation of luna & planetary oberservers lo tey un biaha mas. Nan lo ta esunnan cu lo laga nos goza di un bista mas cerca di planetanan y luna.
Mescos cu aña pasa “stage” ta habri pa storianan cortico y poesianan. Biaha pasa nan tabata riba di 100, e biaha aki nan kier bay pa ariba 110. Kizas nan lo logre?
Hunto nos ta Grandi y Grandi nos lo ta Hunto un biaha mas pariba di kapel 13 October diahuebs 7or!
