ORANJESTAD (AAN): Dialuna durante e di dos reunion oficial di e Parlamento nobo di Aruba, miembronan di Parlamento
a ser pidi pa nan sentimentonan riba inversionnan cuantioso cu Minister di Husticia demisionario kier haci pa locual ta ‘bulletproof vest’ y tambe pa un lichting nobo pa e aspiranten-opleiding pa KIA y KPA.
“Como miembro di Parlamento y Vice-Voorzitter di fraccion di AVP, mi ta comparti cu comunidad mi preocupacion pa cu e situacion penoso cu nos pais Aruba ta pasando aden, unda cu desde januari ultimo nos ta worde azota pa casonan di tiroteo y asesinato, principalmente bao di un grupo di hoben di menos di 25 aña di edad.”
Den e situacion cu nos ta, e necesidad pa material y personal den nos aparato hudicial ta keda indispensabel, pero mesun indispensabel ta e cumplimento di nos mandatarionan na leynan y e responsabilidad pa tin un presupuesto aproba pa nos pais por sigui opera.
Aruba tin lunas sin un presupuesto y e incumplimento aki no por traduci den un derecho di costumber, manera a ser bisa pa e Minister den sala di Parlamento dialuna mainta, unda cu mandatarionan ta busca a base di sentimentonan di Parlamento, un aprobacion pa gasta mas placa sin sa cu Aruba tin’e, miho bisa, mientras cu sa cu Aruba no tin’e!
Minister encarga no por a garantisa miembronan di Parlamento cu e gastonan pa e vestnan aki lo keda den e margen di locual lo tin disponibel pa cu e Ministerio di Husticia den e presupuesto nobo y tampoco por a comparti unda otro den e presupuesto lo corta pa por cubri e gastonan extra aki. Tampoco tabatin e “gunningsadvies” di e compra aki disponibel pa miembronan di Parlamento por a wak.
Alavez, mester considera hopi lamentable e hecho cu 39 persona a worde prometi pa cuminsa cu e aspiranten-opleiding nobo pa KIA y KPA y a hasta pasa den e procedura di seleccion necesario caba pero nan no a worde informa cu e financiamento pa esaki no ta disponibel pa motibo di entre otro incumplimento pa cu pais Aruba su leynan di presupuesto.
Ultimamente mi a comparti varios biaha mi preocupacion cu awendia a bira costumber cu ta tuma decisionnan desviando di nos leynan y responsabilidadnan, e hecho aki ta inaceptabel.
“Nos ta spera cu a corto plazo e Ministernan entrante hunto cu un presupuesto aproba lo por haci cu decisionnan responsabel cu ta worde tuma den liña cu locual nos leynan ta prescribi y necesidadnan ta permiti,” Parlamentario di fraccion di AVP, mr Gerlien Croes a declara.
