Parlamentario Misha Raymond contento cu awor AZV ta cubri logopedie

ORANJESTAD (AAN): Sigur e ta feliz, pasobra a logra cu casi despues di 2 aña, logopedie awor ta accesible pa mucha te cu adulto mayor.

   Por corda back, con riba e fecha di 9 di November 2021, Parlamentario y lider di Fraccion Raiz, Misha Raymond a entrega un mocion cu ta urgi Gobierno pa cubri logopedie den e pakete basico di AZV. Esaki a worde aproba unanimamente, y Minister di Salubridad Publico a duna di conoce cu lo apoya e mocion  aki.

   Despues di a manda varios carta pa follow-up durante aña 2022 den forma di statenvragen y un nota, 5 di april 2023 Raad van Advies ta ricibi concepto di ley pa logopedie, y ta finalisa su conseho 26 di april 2023.

   Na juni 2023 Parlamentario Misha Raymond a bolbe manda serie di pregunta den Parlamento pa cu e status di e ley pa logopedie, y 5 di july 2023 a haci e peticion pa e toezegging pa finalisa e ley di logopedie durante tratamento di BBO na frontera.

   Despues di casi 2 aña finalmente a logra cu desde 2 di september 2023, logopedie oficialmente ta worde cubri pa tur hende cu mester di esaki den e pakete basico di AZV. Parlamentario Misha Raymond ta sumamente contento cu e logro aki pa nos pueblo.

   Pa mas informacion tocante cobertura of tratamento di logopedie por acudi na AZV of bo dokter di cas.