Parlamentario Jennifer Arends-Reyes a bay celebra 45 aña di Aruba Ports Authority

Un pilar importante pa conectividad y desaroyo di Aruba

ORANJESTAD (AAN): Parlamentario Jennifer Arends-Reyes a participa den e celebracion special conmemorando e 45 aniversario di Aruba Ports Authority N.V. (APA), un organizacion cu durante mas di cuatro decada a desempeña un papel fundamental den conectividad y desaroyo economico di Aruba.

  Desde su fundacion, APA ta contribui activamente na operacion, maneho y desaroyo di facilidadnan portuario di nos isla. E infrastructura aki ta esencial pa transporte, comercio y abastecemento di Aruba, y p’esey tin un impacto directo riba funcionamento di nos economia y bienestar di nos comunidad.

Arends-Reyes a felicita directiva, empleadonan, partnernan y tur persona cu, durante e ultimo 45 añanan, a contribui na crecemento, profesionalisacion y exito di e organizacion.

   “Un organizacion por logra un trayectoria asina solamente cu dedicacion, cooperacion y compromiso. Mi reconocemento ta bay pa tur empleado, tanto di pasado como di presente cu, cu nan trabao a contribui na e 45 aña di historia aki,” asina Arends-Reyes a expresa.

   Segun e parlamentario, Aruba mester sigui inverti den un sector portuario moderno, eficiente y sostenibel, cu ta prepara pa responde na e desaroyonan y exigencianan internacional. Alavez, e sector mester sigui crea oportunidadnan pa talento local y contribui activamente na progreso di henter comunidad.

   “Nos wafnan ta un parti esencial di conectividad di Aruba cu resto di mundo. Pa nan por sigui cumpli cu nan funcion strategico, ta importante pa sigui innova, inverti den sostenibilidad y prepara profesionalnan local pa e oportunidadnan di futuro,” Arends-Reyes a añadi.

   Parlamentario Jennifer Arends-Reyes ta expresa su aprecio pa tur esnan cu a forma parti di e trayectoria di Aruba Ports Authority N.V. y ta desea e organizacion hopi exito den e siguiente capitulo di su historia.

Pabien na Aruba Ports Authority N.V. cu 45 aña di compromiso, progreso y servicio na Aruba.