Presidente di Parlamento Marlon Sneek:
ORANJESTAD (AAN)-- Presidente di Parlamento, señor Marlon Sneek, den entrevista cu Matutino DIARIO, a declara cu despues di recess semper ta habri cu un temporada hopi druk cu ta dura e seis ultimo lunanan di aña.
Dialuna siman pasa nan tabata tin reunion cu e Comision Central di Parlamento, y nan a pone deadlines pa contesta preguntanan, entre otro riba “inversteringsverordening”, presupuesto supletorio, y tocante e cambionan riba e Ley di Contabilidad. “Nos a yama un par di nan, y tin un par den pipeline pa wordo yama. Entre otro, mi por bisa cu tin un reunion pidi, mi ta kere nan ta referi na e biahe di Minister Croes, cu manera por a sigui noticia, el a bay LAR”, Presidente di Parlamento a señala.
Presidente di Parlamento a bisa cu ora tin un proceso tin cu respeta esaki. “E minister no ta bay bin un reunion publico pa discuti riba un tema cu, manera den e caso aki, mester bay LAR. Of si e fraccion dicidi cu e ta bay Corte. Kiermen, tur e cosnan aki mester tene cuenta cu ne, y tur e reunionnan cu nos tin pendiente ta wordo yama, y nos ta atende cu nan debidamente”, Presidente di Parlamento, Marlon Sneek a subraya.
