ORANJESTAD (AAN): Innovacion ta importante den un mundo cu ta bira cada bes mas digital.
Ta esencial pa por trata eficiente cu e cambio rapido di nos ambiente y e complexidad creciente cu digitalisacion ta trece. Como e compania lider di seguro den region di Caribe, Guardian Group Fatum ta reconoce e importancia di innovacion y ta inverti den iniciativanan manera e E-Aruba Business Seminar.
Como pionero cu un portal di seguro online, e compania di seguro sa mihor cu cualkier otro con importante y valioso un plataforma digital ta pa keda conecta cu clientenan. E colaboracion y contribucion na e E-Aruba Business Seminar, for di e prome edicion, ta sirbi como testamento di esaki.
"Cu cinco edicion exitoso tras di lomba, y aña pasa cu mas di 700 participante, Guardian Group Fatum ta orguyoso atrobe e aña aki di por contribui na e di 6 edicion di e E-Aruba Business Seminar y asina tambe na e progreso digital riba nos isla. E ta ofrece empresarionan local y otronan den e industria e motivacion y inspiracion pa crese y aspira pa excelencia, usando e tools cu realmente ta mas cerca cu nos mes ta realisa." Di acuerdo cu Djamila Braaf, Marketing Manager Dutch Caribbean na Guardian Group Fatum.”
E-Aruba Business Seminar lo tuma lugar diadomingo 30 di september na Renaissance Convention Center Aruba cu oradornan internacional manera e Head of Growth Marketing di Amazon - Rose Jia, Serial Entrepreneur, Brand Technologist & CEO di Rebrand Cities – Hajj Flemings y Founder di Single Grain & Podcast Host - Eric Siu. Mas aleu, Diederik Kemmerling & Eslaine Croes di The Lab Digital Marketing Agency tambe lo duna un presentacion interesante tocante e tendencianan di marketing na Aruba. Temanan cu lo tin enfasis e aña aki den e seminario ta social media, digital marketing, marketing trends, influencer & video marketing, entrepreneurship y innovacion.
Guardian Group Fatum ta ansioso pa un otro edishon exitoso di e E-Aruba Business Seminar y ta invita tur empresarionan local y partnernan den marketing pa inverti den nan futuro y asisti na e evento.
