Parlamentario Guedez-Erasmus ta felicita Stichting Hunto cu reapertura di Centro Colorado

*Nazorg ta keda hopi importante y ta dedicando hopi atencion na dje

ORANJESTAD (AAN): Recientemente Sociaal Psychiatrische Dienst (SPD) y FMAA uni pa forma Stichting Hunto cu ta percura pa salud mental y adiccion na Aruba.

            Relaciona cu esaki, Parlamentario Darlaine Guedez-Erasmus di Fraccion di MEP a indica cu por mira avancenan den un periodo masha cortico y esaki sigur ta algo di elogia.

            Siman pasa tabatin reapertura du Centro Colorado y esaki tabata un celebracion caminda por a haya informacionnan balioso di e trahadonan cu ta forma parti di Stichting Hunto, e parlamentario a duna di conoce.

            E centro a keda masha bunita mes y esaki por a wordo aprecia ora di a haci un rondleiding. Ademas, por a mira presentacion cu e profesionalnan riba entre otro e tema di nazorg, cual ta hopi importante y nan ta dedicando hopi atencion na dje.

            E coordinado di nazorg, Sra. Lont, a duna informacion hopi relevante como tambe cifranan di 2021 te cu 2024 riba con ta bayendo y riba con por mira progreso den e clientenan, a agrega.

            Guedez-Erasmus a sigui bisa cu nazorg ta hopi importante ya cu despues cu e cliente ta pasa e tratamento, sea na Aruba of pafo ta importante pa nan sigui cu e guia apropia.

            E anochi ey, Sra. Lont a menciona tambe con comunidad por yuda hopi pa e clientenan por keda 'clean'. Mirando cu e clientenan aki mester di trabou, vivienda aporte di famia y un circulo positivo pa sigui apoy’e. Nazorg ta esencial pa clientenan por participa bek den nos comunidad, biba un bida digno y contribui na nos pais.