Parlamentario Evelyn Wever-Croes na presentacion di Climate & Ocean Risk & Vulnerability' Rapport

Un Iniciativa di Gabinete Wever-Croes II

ORANJESTAD (AAN): Diaranson mainta, Parlamentario Evelyn Wever-Croes hunto cu Parlamentario Rocco Tjon a asisti na e presentacion di Climate & Ocean Risk & Vulnerability' Rapport (CORVI) cu a wordo prepara hunto cu Stimson Center. Esaki tawata un presentacion di e Comision Nacional riba Cambio Climatico (NCRC). Parlamentario Wever-Croes a remarca cu CORVI ta un iniciativa, cu awor a bira realidad, di ex colega Ursell Arends cu sosten di Gabinete Wever-Croes II.

   Cu e colaboracion di Stimson Center, a prepara un evaluacion completo di riesgo climatico pa sostene Aruba den su esfuersonan pa bira mas resistente contra cambio climatico. E evaluacion CORVI ta integra casi 100 indicador ecologico, financiero y social pa identifica riesgo climatico y ta recomenda medidanan pa adaptacion. E proyecto aki ta un paso importante den e compromiso di Aruba pa sostenibilidad y proteccion ambiental.

   “A base di e rapport aki lo traha e plan pa Aruba pa prepara pa e efectonan di cambio climatico. Mi ta hopi orguyoso di e iniciativa di Gabinete Wever-Croes II y e trabou haci. Asina nos por garantisa cu e dushi tera di nos ta keda tambe pa nos futuro generacionnan”, Parlamentario Wever-Croes a expresa.