Indice di prijs di consumo pa luna di September 2025

Oficina Central di Estadistica

ORANJESTAD (AAN): E ultimo relato di CPI pa luna di September 2025r, emiti pa Oficina Central di Estadistica, ta indica cu esaki ta 109.17, loke ta representa un subida leve di 0.02% compara cu e indice di Augustus 2025 (109.14).

E cambio di e CPI pa e ultimo diesdos (12) lunanan (September 2024 te cu September 2025) ta -0.4%, un caida di 1.9 punto di porcentahe (ppt) compara cu e periodo corespondiente di aña pasa (1.5%).

E promedio anual (ultimo 24 luna) di e tasa di inflacion pa e periodonan  di September 2022 te   cu September 2023 y September 2024 te cu September 2025 ta 0.2%, un caida di 1.8 ppt compara cu e 2.0% registra den e periodonan di September 2021 te cu September 2022 y September 2023 te cu September 2024.

Durante e luna aki, cinco (5) di e diesdos (12) sectornan a registra subida di prijs. E subidanan cu tabatin e mayor efecto riba e CPI a wordo registra pa e sectornan di “Restaurant y hotel” (3.0%) y “Mobilario” (0.8%), causando un efecto di respectivamente, 0.15 y 0.07 ppt. E subidanan den e sectornan restante a contribui cu un efecto di 0.08 ppt riba e CPI di September 2025.

E subidanan aki a wordo contraresta parcialmente door di principalmente un caida den e indice di e sector di “Recreacion y cultura” (-2.0%) cu a contribui cu un efecto di -0.17 ppt riba e CPI di September 2025. E caidanan den e sectornan restante a contribui cu un efecto di -0.11 ppt riba e CPI di September 2025.

E subida den e sector di “Restaurant y hotel” a wordo causa principalmente door  di  un  subida  di  159.6%  den  e  categoria “Servicio di alohamento”, causando un efecto di 0.12 ppt. E subida den e sector di “Mobilario” a wordo causa principalmente door di un subida den e categoria “Aparato pa uso domestico” (4.3%), causando un efecto di 0.08 ppt.

E caida den e sector di “Recreacion y cultura” a wordo causa principalmente door di caida den e categorianan “Vacacion” (-4.3%) y “Otro articulo y ekipo pa recreacion, hardin y animal domestico” (-2.4%), causando un efecto di respectivamente, -0.09 y -0.06 ppt.

E  canasta  di  consumo  di  e  CPI  ta  consisti  di  408  bienes  y servicionan. Compara cu  Augustus 2025, 45.1% di e bienes y servicionan aki a conoce un aumento di prijs causando un efecto di 0.74 ppt, mientras cu 38.7% ta mustra un caida di prijs, cu a contribui cu un efecto di -0.71 ppt y pa e restante 16.2% no tabatin cambio den prijs. Compara cu Augustus 2025, prijsnan di bienes (-0.2%) a conoce un caida y a causa un efecto di -0.11 ppt, mientras cu prijsnan di servicionan (0.3%) a registra un subida y a contribui cu un efecto di 0.13 ppt riba e CPI di September 2025.