ORANJESTAD (AAN): Un biaha mas, Parlamentario Endy Croes di MEP a haya necesario pa splica, cu pueblo ta prohibi pa lubida e fechorianan di AVP bao liderato di Mike Eman cu a tuma lugar entre 2010-2017.
Ata tin un otro ex-Minister di AVP e siman aki ta den Corte pa purba su di dos biaha pa scapa of baha su castigo.
Manera ta conoci cu Paul Croes, ex-Minister di AVP y intimo amigo di Mike Eman a ricibi un castigo di 4 aña di prison mas 10 aña cu e no por sirbi Aruba den ningun funcion publico. Tur esaki paso Paul a worde haya culpabel di bagamunderia, fraude y corupcion y tin un veredicto di Hues den Prome Instancia.
Riba e sentencia aki tanto Paul Croes a apela pero alaves Ministerio Publico tambe a apela riba cierto fasenan di e veredicto aki.
Desde Februari 2019 a dura casi un aña y mey pa e caso aki presenta back dilanti mesa berde pa asina 3 Hues den Corte Superior repasa ful e caso aki scucha abogadonan, scucha fiscal di ministerio publico y hasta scucha esnan cu ya caba ta condena pa asina dicta dentro di 21 dia un sentencia nobo.
Sea e condena ta keda mescos, sea e condena por aumenta o sea e condena por baha. Cu e conosemento cu nos tin riba e caso aki nunka pero nunka Paul Croes x minister di AVP por sali liber pero nos ta laga esaki den man di e 3 Huesnan pa huzga y duna e veredicto final.
Condena hopi pisa: Segun Endy Croes, e caso IBIS cu e sospechoso mayor Paul Croes ex-Minister di AVP a tuma lugar na Januari 2019.
Desde Maart 2017 caba, Ministerio Publico cu LandsRecherche, RST, FIOT entre otro a drenta cas di Paul Croes momento cu e tabata minister di AVP den pleno poder.
Na Augustus 2017 esta 5 luna despues y net 1 luna promer cu eleccion, autoridad a bolbe drenta cas di Paul Croes y a detene pa alrededor 90 dia. Investigacion pisa a conclui na masha hopi prueba con Paul na un manera di ‘gangster’ a-la-mafia tabata malusa su poder. Paul Croes y su oficina tabata cobra masha hopi placa na un forma structural pa duna permiso.
A haya hasta un schrift cuanto placa Paul tabata ricibi pa cada permiso y con esakinan tabata worde reparti. Paul y su chauffeur tabata shop na Supermarketnan Asiatico tumando hopi bebida pornada a cambio di procesa permiso. Pues un practica masha mahos loke e requisitorio di Fiscal y Ministerio Publico tin poni den nan documentacion cu acusacionnan.
Pues Endy Croes a bisa cu e ta solamente ripiti loke a lesa. Tur esakinan ta publico. Asina tin masha hopi actonan cu un hende decente y normal na su sano huicio nunca lo haci.
Pero, de appel valt niet ver van de boom. Por mira otro casonan di corupcion manera caso Avestruz di Benny Sevinger y a menciona di Mike Eman mes kende a ricibi sumanan por lo menos 50 mil Dollar donacion di mafiosonan cu a worde condena na Merca.
Durante eleccion 2021 recien por a tuma nota con publicamente Paul Croes (kende tin condena di 4 aña di prison) tabata campaña abiertamente hunto cu Mike Eman... y pa Mike Eman esaki tabata masha normal.
Pues esaki ta e famia grandi di AVP y den nan “statuut” di partido probablemente e palabranan criminal-fraude-corupcion-bandido y mafioso mester ta aparece pa nan ta actua asina normal y hasta pone sospechosonan riba lista y grita pa vota pa nan.
Quo vadis Aruba. Nos tin trabaonan duro nos dilanti pa cambia mentalidad di nos pueblo. Reboot and Reset y core cu AVP pa semper pa e lugar aki por drecha.
