RIOHACHA: Nan no sa di unda el a bin, y tampoco si el a wordo transporta conforme reglanan di salud.
Pero Polis cu ta staciona riba e ruta di Riohacha pa Palomino, a intercepta un cargamento di 187 kilo di pisca, cu ta varia di Pargo, Corvina, Waichi, y Robalo. E team cu a intercepta esaki ta consisti di Polis hunto cu Direccion di Impuesto y Aduana Nacional Colombiano.
E cargamento di Pisca tabata wordo transporta den tres saco poni den compartimento di warda maleta den un Bus. E tabata wordo transporta sin e debido condicion di salubridad, y ningun documento pa mustra cu e ta pisca legalmente captura.
Autoridad a conclui cu casi no tabatin ijs mas riba e piscanan, pues nan no ta aceptable pa wordo comercializa ni pa consumo humano. Tin sospecho cu e piscanan aki a drenta via Venezuela na Colombia, pues esey ta haci e situacion aun peor.
