Aruba mester di su profesionalnan:
ORANJESTAD (AAN) Den un suplica urgente na gobierno, parlamentario Dennerich Kelly a lanta su bos riba un tema crucial: e regreso di talento Arubano y eliminacion di obstaculonan cu ta stroba esaki. Kelly a enfatisa cu e situacion actual di studielening Hulandes (DUO) ta keda ta un obstaculo serio pa hobennan profesional Arubiano cu kier bolbe y traha pa nan pais.
Tur aña, centenar di studiante Arubiano ta bay Hulanda pa busca estudio superior, cu e aspiracion pa bolbe y contribui na desaroyo di Aruba. Pero e realidad ta duro: pago obligatorio di DUO den Euro, banda di un sistema estricto y sin consideracion pa e circunstancianan economico riba Aruba, ta forsa hopi pa keda pa afo. “Nos no por sigui perde talento solo pa motibonan administrativo y financiero,” Kelly a declara.
Durante un reunion na November 2023 cu varios minister y instancia gubernamental, un grupo di profesional hoben Arubano a nombra DUO como e obstaculo principal pa nan regreso. E problema no ta nobo—desde 2014, señora Desiree Croes ya a presenta tres mocion pa tuma medida, pero Kelly ta pidi pa un evaluacion nobo, mirando cu e generacion actual ta enfrenta e mesun problema den un contexto distinto.
Kelly tambe a trece atencion riba esunnan cu ya a bolbe. Nan ta lucha cu salario cu no ta competitivo y cu un costo di bida creciente, mientras cu nan tin debe pendiente cu DUO. Esaki ta crea un situacion insostenibel. Kelly ta propone cu gobierno no solamente negocia flexibilidad cu Hulanda via Koninkrijksministerraad, pero tambe implementa un conhunto di medidanan interno pa stimula e regreso.
Segun Kelly, e solucion mester inclui un extension fiscal pa profesionalnan cu ta bolbe Aruba, un fondo di alivio pa yuda cu pago parcial of total di DUO y un esfuerso pa mehora di salario den sector publico y priva. Esaki por ta complementa cu apoyo administrativo pa facilita proceso di integracion laboral y social.
“Nos ta papia di hende cu por sostene nos economia pa proximo 40 of 50 aña. Si nos no crea un trayecto cla pa nan bolbe, otro pais lo sigui beneficia di nos talento,” Kelly a expresa.
E parlamentario ta manda un mensahe cla: Aruba no por sigui perde su profesionalnan hoben pa motibonan cu por soluciona cu boluntad politico y planificacion. “DUO no mester ta un prizon. Nos hobennan mester sinti cu Aruba ta cla pa nan, cu nos ke nan bolbe y cu gobierno tin un plan concreto pa nan futuro. Esaki no ta un luho—esaki ta un necesidad nacional.”
