Hopi ambiente celebrando Dia di Dera Gay na Cas Marie

ORANJESTAD (AAN): E miembronan di Cas Marie ta gusta aprecia cultura di Aruba. 

Nan ta gusta wordo recorda con dushi cultura di nan isla ta.  Y special pa esaki, esnan di Cas Marie a uni forza cu Biblioteca Nacional, y tambe Quota Club International pa asina organiza un ambientoso fiesta di Dera Gay.

    Lisette Croes kende ta coordinadora di actividad na Cas Marie, hunto cu Jeanine y Samantha, a splica cu semper nan ta percura pa keda riba temanan cultural cu e miembronan.   Den esaki, e fiesta di Dera Gay mes ta uno, como cu nan kier pa e miembronan sigui cu nan tradicion y di loke nan tabata celebra antes.

    Na e fiesta aki di Dera Gay, ta casi tur miembro a uni na e celebracion, y cas tabata yen!

    Cas Marie semper ta festeha tur dia di fiesta cu e miembronan, e.o. Dia di Betico, Dia di Himno y Bandera, Dia di San Valentino, Fiesta di Carnaval, Pasco Grandi.   Hecho ta cu tur luna, Cas Marie tin un tema pa festeha, y nan ta decora e lugar tambe.

   E cantidad di miembro na Cas Marie ta sigui crece, y segun Croes a splica comunidad a pidi pa esey tambe, como cu nos tin mas hende grandi cu lo por beneficia di dje.  Nan ta trahando caba pa asina por haya mas espacio pa acomoda extra miembro.