Sistemanan moderno di comunicacion ta sostene progreso di destructor
*Miedo pa no worde acepta ta bira enemigo di hende y sociedad
*Droga a haya asistencia den desaroyo cu ta kibra personalidad propio
ORANJESTAD(AAN)—Durante e segundo parti di Siglo 20, mundo a cera conoci cu avance di loke a bira conoci como “droga”, cu tabata substancia cu ta permiti hende bandona su realidad propio y di su ambiente directo.
“Droga” ta e palabra cu a conkista mundo na un forma acelera na momento cu avancenan tecnicologico tabata conduci hende na un etapa historico nobo cu a kibra bareranan cu prome cu e medionan di transportacion moderno, tabata existi.
E negoshi den droga a haya sosten na momento cu gueranan espantoso manera di Vietnam a uni na e desaroyonan cu a haya sigur hubentud den nan gara.
Adiccion a bira e palabra nobo pa uzo di substancianan cu a transforma comunidad y a haci necesario pa accion wordo tuma pa frena e forma cu peliger tabata avanza.
Adiccion cu mester a wordo atende dor di autoridad tabata basa pues na prome lugar ariba uzo di droga, cu a urgi na autoridad manera Interpol, mundialmente tuma accion y tene conferencianan pa asina asina hunto cu autoridad di paisnan, crea bareranan pa mas avanze di e peliger di droga.
Droga a keda un peliger di e palabra “adiccion”cu abuso di droga y alcohol a comberti den un topico moderno durante un etapa mundial den cual mundo a bira mas chikito a base di e introduccion di medionan di comunicacion nobo den cual sigur mester menciona e medio di television.
Con serio e problemanan di adiccion a bira, a bini dilanti durante Covid-19 ora durante e pandemia, autoridad mester a confronta criminalidad di parti di bandanan cu a uza e oportunidad aki pa aumenta nan actividad.
Na añanan 70 y 80 por a nota con tambe na Antia Hulandes di cual Aruba tabata forma parti, atencion a wordo dirigi ariba e forma alarmante cu droga a avanza sigur bou hubentud y hasta na schoolnan, caminda hobennan tabata tin miedo di wordo rechaza si nan no tabata bira parti di e tendencia nobo.
Ta den e tempo aki Interpol a tene su prome congreso acerca di droga na Antia Hulandes, di cual Aruba ainda tabata forma parti pa asina por a confronta e amenaza cu a haya un dimension mucho mas serio cu por a spera.
Paso a paso mundo di expertonan cu ta atende cu e parti mental di hende, a bin topa cu evidencia cu hende ta wordo afecta seriamente dor di e afan di hende pa sigui loke ta na moda.
Adiccion awe a bira uno di e problemanan mas serio cu ta existi den comunidad moderno y cu a haci cu mester a introduci un dia special pa asina para keto ariba e peliger grandi cu adiccion ta crea pa un comunidad, den cual hende tin mas miedo di wordo rechaza cu miedo pa perde hasta su familia, su salud y su bienestar.
Awe manera anualmente ta e caso, mundo a para keto na e forma cu miedo pa no wordo acepta dor di otronan, ta haci hende uni su mes na loke ta wordo considera como normal nobo.
Awe ta e dia cu Nacionnan Uni a proclama como Dia contra Adiccion, cu na tur parti di mundo ta causante mas grandi di problema pa hende.\
Internet a bira e forma directo cu hende ta comunica cu otro. El a bira centro di bida di hende, cu ta retira di familia y gruponan di amigo pa hiba un bida falso riba internet y sigur riba e “site”caminda nan por comunica cu hende desconoci pa nan rond mundo cu ta bira mas importante cu nan propio familia.
Comunicacion moderno a kibra tur barera y a bira e medio mas grandi pa abuso di droga y alcohol, pa wega di placa, pornografia y abuso di medicamento.
Mucha chikito ya ta adicto di tendencianan nobo cu ta wordo presenta y cu nan por sigui pa medio di telefon cu ta habri porta pa nan tin comunicacion directo cu un mundo peligroso.
Awe ta un dia special pa atende cu e amenaza mas grandi cu tin na mundo y cu ta basa riba e miedo di lucha pa un personalidad propio basa riba conviccion di loke ta bon y loke ta malo y no ariba normanan falso cu ta wordo propaganda como moderno y ta haci hende hasta bira ladron y prostituta pa asina haya placa pa nan por wordo acepta y nan por disfruta di tendencianan nobo cu ta bay contra normanan di decencia y di normalidad di pais y di familia.
Awe autoridad ta bringa contra resultadonan directo di hobennan cu a bira criminal pa adiccion di droga pero tambe di exigencianan di mundo moderno na cual nan a bira adicto ya cu nan ta incapaz pa sigui nan propio conviccion y respeta nan mes como hende.
DIARIO ta uni awe na e lucha nacional pa asina cera porta na un uno di e rutanan mas moderno di criminalidad y abuso di droga, cu ta imposicion di normanan nobo cu ta haci hende adicto na loke ta conduci na destruccion di e ser humano, su familia, su ambiente y su comunidad, cu ta depende di e hende cu no por entrega su mes na substancia manera droga ni miedo pa no pertenece na gruponan cu no merece nan sacrificio di nan bienestar.
