Parlamentario Clifford Heyliger nombra como vice-presidente adhunto di Caribe den congreso di ODCA

ORANJESTAD (AAN): Den representacion di Partido AVP y Aruba, Parlamentario Clifford Heyliger a asisti e di 24 Congreso Statutario di Organización Demócrata Cristiana di América (ODCA),

cu a tuma luga entre 4 y 6 di juni 2025 na Bogota, Colombia. ODCA ta un organisacion politico regional cu ta uni mas cu 35 partido for di 25 pais Latino Americano y Caribeño, incluyendo AVP como miembro activo.

   E congreso tabatin como anfitrion e Partido Conservador di Colombia y e sesionnan plenario a tuma luga na e edificio oficial di Senado di Colombia, na presencia di lider politico prominente, incluyendo e Presidente di Senado, Sr. Ephraim Cepeda. E evento tabata transmiti en bibo pa aumenta transparencia y participacion. “Un honor grandisimo pa Aruba y pa mi personalmente pa por representa nos pais den un foro internacional di e nivel aki,” Heyliger a expresa.

   Durante e congreso a trata varios tema crucial, incluyendo e impacto di e guera na Ucrania riba alocacion di presupuesto den paisnan Europeo, caminda fondo cu anteriormente tabata destina pa ayudo humanitario awo ta redirigi pa gasto di defensa y siguridad. A palabra tambe riba e uzo di ‘soft power’ den relacionnan internacional, cu ta referi na e poder di influencia

economico y cultural sin uzo di forsa militar — un modelo ehemplar ta Alemania, un pais cu no tin un gran presencia militar, pero cu ta eherce hopi peso politico.

   Otro tema importante tabata e peliger creciente di desinformacion via social media, e falta di presencia di USAID den region y su impacto negativo, asina como e rol strategico di Union Europeo den Latino America. Ademas, hopi preocupacion tabata presenta tocante e menasa pa democracia den nos region, particularmente e aumento di partidonan di e extremo politico. Partidonan di extremo izquierda ta muestra tendencia dictatorial, mientras cu partidonan di extremo drechi ta move den direccion autocratico. Criminalidad organisa tabata menciona tambe como un riesgo serio pa stabilidad den paisnan Latino Americano y Caribeño.

   Como parti final di e congreso, eleccionnan pa e directiva nobo a tuma luga y Parlamentario Clifford Heyliger a keda eligi como Vice Presidente Adhunto pa e region di Caribe. “Mi ta sinti mi profundamente comprometi pa pone e bos di Aruba riba mesa internacional, y pa sigui lucha pa democracia y stabilidad den nos region,” Heyliger a conclui.