Director Erwin Lopez, director:
*E studiante por drenta automaticamente na EPI
*E ta haya un diploma MBO-2
ORANJESTAD (AAN) – Den un entrevista cu Matutino DIARIO, señor Erwin Lopez, director di EPB-Oranjestad, a declara cu e aña escolar aki a bay hopi bon incluso riba tereno social.
Meneer Lopez a duna di conoce cu e resultadonan no tur ta cla ainda, pasobra EPB su sistema di examen ta otro.
“Nos no ta traha mucho cu Examen Bureau mas, nos examennan tur ta bin di Hulanda, kiermen, nos tin cu warda p’esey caba. E proximo siman nos ta bin cla cu nos por duna slaag. Pa otro aña nos ta premira cu basta mucha di MAVO ta bay bin atrobe. Pa aña nos ta haya entre 100 cu 125 mucha di MAVO cu ta keda sinta, cu lamentablemente, ora nan keda sinta un dos biaha, nan ta manda nan pa EPB”, Cabesante señor lopez a señala.
El a expresa cu su preocupacion ta cu e muchanan aki ta perde hopi tempo na MAVO, siendo cu EPB ta warda nan, nos tin lugar pa nan, y nan por haya un bon educacion, apesar di tur loke hendenan ta papia eyfo.
“EPB tin un bon educacion, ora bo caba bo ta un nivel MBO. MBO ta mescos cu Colegio EPI. Ora bo caba EPB cu diploma MBO-2 bo ta drenta automaticamente den EPI, y hasta bo tin bentaha riba muchanan di MAVO. Kiermen, e ta cumbini bo caba si bo kier bay EPI, bo tin un lugar sigur y bo tin un profesion, loke ta hopi importante”, meneer Lopez a remarca.
Meneer Erwin Lopez ta lamenta cu nan a cuminza cu mal pia cu EPB, y a keda un mal percepcion den pueblo. “Antes tabata tin hopi problema, hopi pelea riba tereno di EPB, y esey a duna nos un mal nomber. Pero mientras tanto esey a caba y nos no tin ni mas ni menos problema cu e otro scolnan, y e educacion aki su nivel ta hopi halto. Aworaki, manera mi a bisa, nos examennan ta bin di Hulanda, kiermen ora bo haya un EPB Diploma, e ta mescos cu esun di Hulanda. Corda bon, esaki no ta un diploma di Aruba manera hende ta bisa, esaki ta un diploma na nivel europeo. Ora bo caba cu e diploma aki, bo ta drenta cualkier scol na Hulanda”, director di EPB-Oranjestad, Erwin Lopez a enfatiza”.
