Parlamentario Carlos Bermudez kier mira mas accion den mantencion y limpieza di camindanan publico

ORANJESTAD (AAN) - Parlamentario Carlos Bermudez a tuma nota cu Gabinete AVP-FUTURO a cuminsa tuma paso pa atende cu e tema di limpieza riba nos isla.

El a reconoce cu cierto limpieza a tuma luga den districtonan manera Noord, Oranjestad y San Nicolas. Minister Dowers a duna prioridad na caya principal, incluyendo Wilhelminastraat, caminda hopi inversionista ta kere den e desaroyo y gobierno, di su banda, a mustra cu e ta balora e esfuersonan aki.

            Bermudez ta compronde cu no por spera cu Minister di Infrastructura y Minister di Medio Ambiente por cubri tur area nan mes, pero el ta enfatisa cu Departamento di Obranan Publico (DOW) y e unidadnan encarga cu limpieza mester ta visibel den mas zona di e pais.

A pesar cu algun trabou a cuminsa, e parlamentario ta profundamente preocupa pa cu e nivel halto di sushedad y falta di mantencion banda di caminda.

            Durante e tratamento di presupuesto di DOW dia 30 di april ultimo, Bermudez a presenta pregunta y sugerencianan concreto. Minister Dowers a duna contesta parcial y a pidi pa dirigi algun di e preguntanan oficialmente pa trata nan cu e seriedad cu nan merece.

            Bermudez ta lamenta cu despues di e reunion, e cambio real cu a spera di, entre otro DOW, ta minimo; particularmente den areanan vital pa nos turismo. Un di e ehempel principal ta e caminda di aeropuerto bin abou; un area cu ta den abandono: yerba ta crece entre e klinkers y e matanan (kwihi) banda di caminda no ta manteni. 

            Pa hopi turista, esaki ta e prome impresion cu nan ta haya di Aruba – un situacion cu ta lamentabel. Sin papia di e rotonde na Las Americas, cu bou e gabinete anterior pa añanan largo tabata den un estado di ‘renobacion’. Segun Bermudez, ta como sifuera no tin un ploeg asigna pa e ruta menciona. Un situacion cu ta similar den hopi districto y bario. 

Ciudadanonan preocupa

            Varios ciudadano a acerca e parlamentario cu preocupacion y peticion pa Gobierno y DOW tuma accion. Tin ciudadano cu di nan mes cu ta intenta mantene areanan publico limpi y sigur (pa por cana), pero e momento a yega pa DOW asumi su responsabilidad.

Bermudez ta pidi DOW un biaha mas pa sali riba caya, evalua e realidad, traha un plan di accion y ehecuta esaki. Cant’i caminda mester haci limpi y kita obstaculo cu ta stroba peaton di cana den siguridad y cu ta mahos bista.

            Ehempel segun parlamentario Bermudez, Noord no ta hayando e atencion cu e merece. Noord ta mas cu djis e area di hotel high rise. Caminda di Palm Beach cuminsando di warda di polis Noord te rotonde banda di Wendy’s\KFC ta total loss. Tur dia yen di turista ta transita riba e ruta aki. Niun hende cu ta wak e sushinan y e matanan cu ta stroba e peatonnan di por cana libremente.

            Trottoir tras di misa protestant ta den un mal estado. Un caminda cu turista ta frecuenta. Ta manera cu nos ta warda un persona cay y herida nan mes, pa e ora ey tuma accion. Otro ehempel cu Bermudez a duna ta Fortheuvelstraat na San Nicolas caminda peaton no tin luga di cana. Yerba tur caminda. Tambe e caminda di Lago Heights ta tur sushi; otro ruta cu turistanan ta tuma pa yega Baby beach y Rodgers Beach. 

Peticion\Sancion\Cambio di ley

            E parlamentario tambe ta pidi Gabinete AVP-FUTURO pa cuminsa mas pronto posibel cu e campaña di informacion  riba e importancia di mantene nos isla limpi. Fuera di esey, ta propone pa gobierno berdaderamente considera introduci un sancion contra esunnan cu ta haci negoshi di tira sushi unda cu ta. Hunto cu esey, mester yega na un solucion aceptabel pa pueblo por deposita nan sushi den un manera sigur y economicamente accesibel.

            Parlamentario Bermudez ta termina enfatisando cu Parlamento – y particularmente e fraccion di AVP – ta cla pa duna sosten y haci lo necesario, incluyendo cambio di ley, pa pone un paro na e problema di sushamento di nos dushi baranca Aruba.