Parlamentario Alvin Molina ta orguyoso di e cancha di basketball nobo den Village

ORANJESTAD (AAN): Village Basketball Court sigur ta e resultado di un bon colaboracion entre diferente departamento cu ta resorta bou di Minister Endy Croes.

   Parlamentario Alvin Molina di MEP, a indica cu tur hende por corda con e cancha tabata deplorabel y peligroso pa e habitantenan di Village y bisindario. Awe nos por wak cu e cancha ta un hoya di proyecto.

   E trayecto no tabata uno facil y cu recurso financiero limita, pero e minister a demostra cu ora tin e deseo, disciplina, dedicacion y determinacion ta logra e meta comun. Nos por wak back riba un proyecto exitoso na bienestar di e mucha- y hobennan di San Nicolas. Durante mi bishitanan na e cancha mi por mira e muchanan den bario contento ta practicando deporte.

   Loke falta ainda ta un bari di sushi, cual ta importante pa esnan cu ta frecuenta e cancha aki, por deshaci di nan desperdicio. Tambe, falta e gol di futbol y un net di volleyball.

   Sigur un plan di mantenimento ta di vital importancia pa asina nos por gosa di e cancha pa hopi aña. Esaki mester ta un colaboracion entre e habitantenan, esnan cu ta haci uzo di e cancha deportivo y gobierno. Mi ta invita e habitantenan di Village y bisindario pa e apertura oficial cu ta tuma luga diabierna 22 di maart di 5:30 pm pa 7:30 pm.

   Danki na Minister Endy Croes y su ekipo pa duna oido na nos peticion y pa ehecuta e bunita proyecto aki. Alavez mi ta gradici e habitantenan di Village y bisindario pa nan pasenshi y “input”.