Minister Ursell Arends ta splica:
ORANJESTAD (AAN)—Den entrevista cu DIARIO, Minister Ursell Arends a reitera cu entre November y December 2023, el a clarifica e asunto di e makinaria nobo cu Ecotech a inverti den dje, pa yuda den e situacion di e dump di Parkietenbos.
Arends a reitera cu e makinaria nobo cu Ecotech a inverti den dje a 'shut down', y e problema cu esaki no ta pieza ni nada di esey. “E ta un sistema cu ta traha completamente cu computer, y esaki a daña den Luna di Januari. Expertonan a bin pa restart esaki pero mester tene cuenta cu tur e desperdicionan cu tin den e seroe ta desperdicio berde. Aworaki nan ta trahando tur fin di siman pa procesa esaki y nan a bisa gobierno cu dentro di un luna e seroe aki mester wordo elimina. Y esey ta e proceso cu tin. Mi ta kere cu e ta un compania serio y nos tin cu confia nan palabra tambe”, e dignatario a remarca.
E mandatario a reitera cu e sistema a shot down entre November y December y na Januari e ekipo a cuminza traha bek, y dos siman pasa cu e tabata tin combersacion cu e dirigentenan di Ecotech cu Free Zone, nan a bisa cu lo dura un luna mas cu e seroe aki lo wordo atendi cu ne.
Pa loke ta Ser’i Teishi, e mandatario a splica cu eynan tin baling ta tumando lugar y cada un ta un ton di desperdicio. “Si mi no ta hera tin suficiente diferente cel. Tin 20 cel y aworaki nan ta bezig cu e cel number 8, y esakinan ta wordo controla pa e Departamento di Gobierno tambe, con e proceso aki ta wordo haci”, Minister Arends a indica.
El a agrega cu Serlimar y DNM (Departamento Naturaleza y Medio Ambiente) ta esnan cu ta controla e trabaonan, y nan no a ricibi nada negativo tocante e cumplimento di Ecotech, pa loke ta e manera con e baling tin cu tuma lugar.
Minister Arends a indica cu mas ainda, nan ta bay “skill op” pa tin control riba e calidad di aire cu tin den e vecindario. Ministerio di Naturaleza a inverti den esaki, tambe pa haci e datonan aki publico, p’asina aki tur hende por mira e calidad di aire cu tin.
