Parlamentario Alvin Molina papiando riba Daniel Leo kende ta nos protector di agricultura

ORANJESTAD (AAN): Fundacion Formacion Politico Nelson Orlando Oduber (FFPNO) a organiza un charla en conexion cu fecha natalicio di Sr. Daniel Leo den feliz memoria.

Sr. Daniel Leo ta gran pionero riba tereno di, entre otro, agricultura, cria, pesca y turismo di nos pais. Sr. Leo a ocupa e funcion di Minister di Asuntonan Economico y Turismo den Gabinete Oduber I. Den su maneho, a coba damnan rond Aruba y a funda e departamento LVV (Santa Rosa) pa promove agricultura, cria y pesca.

Un oportunidad y potencial grandi pa diversifica nos economia ta nos sector primario. Mas mi siña tocante e sector primario, mas mi ta aprecia e arte di planta, cria y bestia. E tecnica, pasion y esfuerso cu nos hendenan ta pone den dje ta simplemente increibel y admirabel. Sigur nos mester corda riba nos agricultornan cu ta eherce e arte ainda na un manera tradicional, manteniendo nos cultura di antes. Tur agricultor mester y merece sosten pa nan esfuerso.

E industria nobo lo yuda pa eleva economia, crea cupo di trabao y pa garantisa cu tin productonan di calidad halto na un prijs rasonabel pa nos ciudadanonan.

Mi tin di bisa cu lamentablemente nos Minister di Sector Primario no ta haciendo loke ta necesario pa e agricultor, criado di bestia y e piscado. Maneho y ehecucion di un cartera ta responsabilidad di e Minister en cuestion, pero como parlamentario mi tambe tin responsabilidad pa cu e topico. Pesey mi a entrega mocion, skirbi carta cu pregunta, organiza reunionnan cu “stakeholders” y pidi pa reunion cu Minister di Sector Primario. Den tur esaki Minister ta demonstra masha poko interes.

  Nos por mira cu otro Ministernan, por ehempel di economia, labor, enseñanza y infrastructura si ta moviendo pa promove agricultura, aunke primordialmente no ta nan responsabilidad.

   E charla sigur a motivami pa sigui duna di mi banda pa nos por yega na un nivel di agricultura cu lo haci Sr. Daniel Leo orguyoso.