ORANJESTAD (AAN) — Minister Ursell Arends, titular di Transporte, den entrevista cu DIARIO tocante e hecho cu e tram lo core bek riba Caya Betico Croes,
pero atardi entre 1’or y 4’30 pm, a agrega cu segun por a tuma nota di estadisticanan di barconan crusero e horario aki, ta esun miho pa tram core den ciudad.
E mandatario a indica cu Arutram conhuntamente cu DOW a sinta delibera kico tur mester modifica, y a presenta datonan, y a traves di esakinan a tuma e decision cu e horario menciona ta esun miho pa e tram por opera.
El a señala tambe cu ta bay tin borchi pa indica e horario cu trafico por frecuenta centro di ciudad, mescos cu ta bay tin ora e tram ta opera. Arutram hunto cu DOW a haci tur e modificacionnan y ainda falta algun. E control tambe ta bay ta estricto, pa asina pueblo tambe por adapta su mes na e cambionan aki. E mandatario ta convenci cu esaki ta miho pa e comercio estableci na Caya Betico Croes, y e ta spera cu esaki por produci su frutonan tambe, y comercio por ripara e mehoracion y e tram ta trece e turistanan crusero den centro di ciudad.
