ORANJESTAD (AAN): Directie Infrastructuur en Planning (DIP) a yega Parlamento di Aruba.
Retonan nos tur sa cu tin, e pregunta ta: kico ta e solucion cu lo beneficia Pueblo di Aruba, segun parlamentario Alvin Molina di MEP.
Señora Marilynn Dirksen, director suplente di DIP, a splica e motibonan di con e servicio di DIP no ta optimal. DIP ta traha segun e sistema ‘First In, First Out (FIFO)’. Mirando e retraso di miles di peticion cu tin, awo ta trahando riba e peticionnan di aña 2013, lo mester haja un manera pa caba cu e retrasonan mas lihe posibel. Pa basta aña e falta di maneho y casonan penal/disciplinario a causa un falta di confianza y miedo bou di e personal. “Personeelszorg” tambe ta laga hopi di desea.
Un atraso grandi den promocion a causa varios caso den corte y malcontento cu a afecta e productividad. Tambe, tin un “onderbezetting” grandi na DIP, solamente 35% di e funcionnan ta ocupa. Señora Dirksen y su team a presenta e plan cu nan ta trahando riba dje pa mehora e servicio na pueblo. Hunto cu e pregunta- y sugerencianan haci door di e parlamentarionan a yega na entre otro e siguiente puntonan:
(1) Haci e proceso mas facil, transparente y digitalisa pa e clientenan (nobo) por ricibi un contesta dentro di algun luna.
(2) Busca un grupo di profesional pa traha riba e retrasonan.
(3) Departamento di Recurso Humano ta cooperando bon pa drecha posicion huridico “rechtpositie” di e trahadonan. Esaki sigur lo yuda mehora nan motivacion y productividad.
Señora Dirksen a indica cu no por bisa ainda con largo e proceso di mehoracion lo dura, ta depende di e casonan andando, cooperacion di Departamento Recurso Humano (DRH) y di Ministerio di Infrastructura. Pa hopi tempo DIP a keda pega sin por a mira un adelanto. Señora Dirksen a agrega cu pe y su team D.I.P. ta significa ‘Diligently In Progress’.
Esaki ta significa cu D.I.P. ta trahando cu precaucion riba mehoracion y reorganizacion di e departamento.
Segun Molina, como parlamentario ta importante cu e por mira cu trabaonan ta worde haci pa mehora e servicio y cu esfuersonan ta worde haci pa acelera e mehoracion mas tanto posibel.
El a finalisa bisando: “Sigur un bon reunion unda cu nos a ricibi informacion actualisa di e plan di DIP. Mi lo sigui “follow up” cu DIP y cu nos Minister di Infrastructura.”
