Colaboracion exitoso pa asina lansa 5 video di concientisacion di intervencion trempan

Departamento di Mucha y Hoben

ORANJESTAD (AAN): Faltando algun dia so pa duna atencion y nificacion na Dia Internacional di Persona cu limitacion/discapacidad, Departamento di Mucha y Hoben conhuntamente cu Multidisciplinair Centrum (MDC), Kiwanis Club of Palm Beach y Minister President a lansa 5 video di conscientisacion di Intervencion Trempan den comunidad, specialmente den e centronan di cuido di mucha.

   E proyecto di Intervencion Trempan ta uno hopi balioso pa e mucha di 0-4 aña cu ta bishita un centro di cuido di mucha, como e mayornan y e trahadornan pedagogico. Intervencion Trempan ta parti di e derechonan di mucha  y DMH ta brinda apoyo, guia y informacion na e mayornan, pa asina yuda e much aña un edad hopi mas trempan. A base di e instrumentonan cu DMH ta uza, un mayor y centro di cuido di mucha ta haya sa mas di e retonan cu un mucha por tin den un di su areanan di desaroyo, esta: cognitivo, adaptivo, social emocional, fisico, comunicativo. Entre mas liher un profesional detecta e deficiencia, mas liher por yuda e mucha y asina mehora su calidad di bida.

   DMH tin 6 paso concreto delinea desde e momento cu un mucha mester sigui e programa di intervencion trempan. DMH lo crea un plan di accion profesional, involucrando tanto e mayor como e centro di cuido di mucha.

   Stimulacion continuo den e 5 areanan di desaroyo ta sumamente importante den bida di un mucha, specialmente den e edad di 0-4 aña, unda cu mediante diferente wega y actividad e adultonan mester duna atencion, pa den un forma preventive atende cu e retonan di desaroyo di e mucha.

   DMH kier gradici Kiwanis Club of Palm Beach, MDC y Ministerio di Asuntonan General pa tabata dispuesto y disponibel pa colabora den e proyecto di conscientisacion aki y sigur tin mas na caminda den 2024. Alavez DMH ta haci apelacion na tur mayor, pa bishita e website www.dmh.aw y asina haya mas informacion si ta desea di forma parti di e structura di cuido aki den centro di cuido di mucha.