Concierto di Centro Kibrahacha lo tuma lugar Diasabra 9 di December proximo

Lucia Hoek, coordinador di actividadnan:

ORANJESTAD (AAN) — Lucia Hoek, Coordinador di Actividadnan na Centro Kibrahacha, a duna di conoce, den entrevista cu DIARIO, cu den presencia di notario, a tuma lugar recientemente, nan rifa pa recauda fondo, cu a resulta hopi exitoso.

Lucia a comenta cu normalmente nan rifa ta na Juli, pero e aña aki nan a postpone pa December awo, pa motibonan fuera di nan alcance.

Nan a logra y e rifa tabata 100% bendi, y Centro Kibrahacha ta hopi contento cu esaki.

Locual ta bay recauda ta bay bek pa e miembronan y pa tur locual mester wordo haci den Centro Kibrahacha, señora Hoek a menciona.

E miembronan mes a bende ticket y comercio tambe a coopera cu Kibrahacha masha bon, y nan ta hopi gradici mes, Hoek a expresa.

El a agrega cu e temporada aki di December ta hopi druk, y organiza e loteria mes a tuma hopi trabao, cu no ta facil, pero un ta yuda otro y asina a conclui cu un exito grandi, den oranan di mainta. 

CONCIERTO DI PASCO:

Lucia Hoek a menciona cu otro siman, dia 9 di December, lo tin e Concierto di Pasco, cu dos grupo cu ta haya les di cuarta durante henter aña. Y fuera di esey, e miembronan mes lo deleita e presentenan cu algun cantica di Pasco di Nacemento.

El a reitera cu e Concierto ta Diasabra 9 di December, pues e fin di siman aki, di 6’or pa 8’or. Entrada ta gratis y tur persona lo ta bon ricibi. E lo tuma lugar na e planchi di Centro Kibrahacha mes. Snacks y algo pa bebe lo no falta.