Parlamentario Alvin Molina cu sosten pa e hazaña di Heintje Ras

ORANJESTAD (AAN): Parlamentario Alvin Molina di MEP tabata presente Diasabra atardi, na momento cu e ciudadano Henry ‘Heintje’ Ras a baha den Mina di Fosfaat pa logra yega na su hazaña di 100 dia,

y di e forma ey sperando di por haya sosten di pueblo pa recauda fondo, pa sina haci e Mega Museo di Aruba bira un realidad.

   Como un representante di San Nicolas, Parlamentario Molina a splica cu e ta orguyoso di ta presente pa mira e bunita ehemplo, di ora cu hende cera cabez cu otro y forma un union, bo ta mustra tur loke ta posible.

   E ta admira cu Heintje Ras a cuminza ta colecciona artefactonan di antiguedad, y awor su meta ta pa yega na un Mega Museo pa pone tur esaki aden pa henter Aruba por goza di dje den futuro.

   Pueblo di San Nicolas no ta para keto, y kier pa e bario lanta cabez bek!  Molina a bisa cu e ta bay bira un lucha sigur pa logra mas cos pa San Nicolas.  Si pueblo keda uni mescos cu Heintje a demostra, por mira e ora cu ciudadanonan mes por canaliza y habri caminda pa fondo por drenta y realiza proyectonan.

   Berdad ta cu e situacion financiero di Gobierno ta hopi debil, pues sigur ta di aplaudi cu pueblo mes ta busca forma pa recauda fondo.  Aunke toch pa cu e hazaña aki, Gobierno sigur lo bay tin un rol grandi den dje, e.o. cu e otorgamento di permiso pa e hazaña, etc., y hunto cu Ministerio di Husticia a pone personal di Polis y tambe Cuerpo di Bombero keda standby.

   Y den futuro ora cu cuminza traha riba e plan di Mega Museo di Antiguedad aki, Gobierno tambe lo tin di bay duna su cooperacion pa cu e.o. otorgamento di tereno, y demas colaboracion pa haya un bon resultado den e bestemmingsplan, pa asina e bira un exito.

   Ideanan pa San Nicolas y su desaroyo?  Parlamentario Alvin Molina a indica na DIARIO, cu durante campaña ta masha hopi idea y sugerencia tabata ricibi di pueblo.  E deseonan aki tin di bay sinta na mesa cu tur stakeholders, y laga nan bira realidad.

   Pero un idea ta haya caminda di cana, ora cu bo ‘vul-aan’ tur extra detaye necesario.  Bo mester tin un plan grandi prome pa destina kico kier logra cu e area ey, y e ora ta bay yena den dje tur e deseonan cu pueblo tin.

   Parlamentario Molina a desea Heintje Ras tur clase di exito y deseo di perseverancia pa su 100 dia den Mina cu e lo no mira ni solo ni luna.