Dos hoos den area pa bay Natural Bridge a hala hopi atencion

ORANJESTAD (AAN): E pronostico di tempo di trempan a indica cu lo bay ta un dia hopi calor, y cu biento lo cay bastante y debi na esey e velocidad lo ta entre apenas 1 y 19 km/h.  Pues tabata fomenta un sentimento di calor inmenso.

   Basa riba nan experiencia, semper nos grandinan na Aruba tabata indica cu “ora tempo ta benauwd, nubianan bira diki y no tin biento, tin di tene cuenta cu hoos por forma”.

  Y esey ta exactamente loke a socede Diabierna un poco prome cu 2:00 pm, na e parti di lama panort.

   E momento ey un cluster di nubia y un bentabal isola a forma den vecindario di Natural Bridge.  Y dado momento por a mira cu simultaneamente dos hoos a forma riba lama.

   Ambos a baha y yega na lama, y turistanan presente e momento ey a yame un ‘waterspout’.

   E dos hoos aki a pone cu den un rato di tempo, ta varios ciudadano a yega ey cerca cu nan auto pa asina mira e fenomeno di naturaleza aki.  Por a mira cu lama si tabata un tiki bruto na banda panort di e isla.

   Un di e hoosnan aki a cuminza haya un forma basta diagonal y dado momento tabata parce cu e ta yegando cerca di costa.  Ni algun minuut despues, esaki a subi barancanan y a converti su mes den un warwaru cu a cuminza plama stof diki color cora, den halto.

   Mesora por a mira chauffeurnan cu a bay tira un bista, busca forma pa aleha nan mes di e hoos aki.  Finalmente tur dos a yega un fin y no a ocasiona ningun daño na hende.

   Pa awe Diasabra, e pronostico ta cu tempo lo cuminza supla un tiki mas compara cu Diabierna.  Pero keto bay e chens ta cu awacero por forma inespera den e region y bin acompaña pa lamper y strena.