Sietske van der Wal a splica:
ORANJESTAD (AAN) -- Sietske van der Wal, Conservation Education Manager na Parke Nacional Aruba, a informa cu FPNA tin un proyecto di restauracion, cu ta consisti di refnan artificial, cu ta structuranan cu nan a traha, y cu ta introduci nan pa, eigenlijk duna e coralnan un base pa nan cuminza crece bek.
“E idea no ta pa e structura cu nos a traha keda eynan pa semper, e ta keda desintegra a lo largo, pa e coralnan take over pa restablece di nan mes”, e dama a señala. El a reitera cu e deterioro di e refnan di coral ta producto di actividadnan den lama cu a causa destruccion, entre otro factornan, pero banda di esey e otro impactonan cu tambe tin andando, ta haci imposible pa e naturaleza bin bek full, di su mes.
Van der Wal a señala cu por a wak durante e temporada di Covid, cu ningun hende tabata bay lama, con lama a cuminza recupera. “Pero e mester di hopi tempo pa logra esey, y mester yude un tiki pa cuminza restaura di su mes, drecha bek y bira mas resiliente contra tur impacto, teniendo cuenta tambe cu nos tur mester siña e diferente impactonan cu tin, manera polucion y otro aspectonan cu mester wordo miho regula y baha e otro impactonan tambe, pasobra no tin sentido pa bay restaura algo si e otro impactonan no ta wordo kita.
