Parke di Esso Heights a haya luznan LED

“Un promesa mas cumpli:

ORANJESTAD (AAN): Den luna di februari 2026, Prome Minister Mike Eman a realisa un bishita na Esso Heights hunto cu diferente departamento publico manera Serlimar, Bureau City Inspector, DOW, FCCA y Polis di Bario. Durante di e “Accion di Bario”, a realisa un limpiesa profundo, incluyendo retiro di desperdicio grandi manera frigidaire, stoof y muebles, preparando e area pa habitantenan.

Durante e bishita, Prome Minister a tene un dialogo directo cu comunidad pa scucha nan preocupacionnan y identifica e necesidadnan mas urgente. Entre esakinan, a sali na cla cu e Parke di Esso Heights mester atencion adicional, specialmente riba tema di siguridad y iluminacion.

E parke, cu tin un gazebo, cancha di basketball y espacio pa recreacion, ta un punto di encuentro importante pa bario. Sin embargo, falta di iluminacion tabata limita uzo di e area durante anochi y a crea preocupacion entre habitantenan.

A base di e señalnan ricibi durante e “Accion di Bario”, Gobierno a tuma accion concreto. Parke di Esso Heights a haña su luznan LED, un resultado directo di e enfoke pa atende necesidadnan real di comunidad.

E instalacion di e luznan LED ta representa mas cu un mehoracion tecnico. E ta contribui na un ambiente mas sigur, permitiendo cu mucha, hoben y adulto por uza e parke tambe durante anochi. Un parke bon ilumina ta yuda reduci riesgo di vandalismo y ta crea un sentido di siguridad mas grandi pa residentenan.

Ademas, e mehoracion aki, ta amplia e uzo di e espacio publico. E cancha di basketball, cu ya tabata activo, awor por keda bibo te despues, fomentando deporte, interaccion social y encuentro den comunidad.

E luznan LED tambe ta un inversion sostenibel, mirando cu nan ta uza menos energia, tin un bida mas largo y ta reduci gastonan di mantencion a largo plaso.

E resultado aki ta refleha e compromiso continuo di gobierno pa drecha barionan cu accion concreto. E caso di Esso Heights ta un ehempel cla: ora ta scucha comunidad ta y ta atende cu necesidadnan cu accion, e resultado ta visibel.