Parlamentario Evelyn Wever-Croes
*Ken ta determina e agenda di parlamento?
ORANJESTAD (AAN): Dialuna 11 di mei tabata tin un debate den Parlamento riba peticion di MEP. Ta trata un peticion di dia 17 di april 2026, den cual fraccion di MEP a pidi un reunion cu minister di enseñansa, riba tema di destaho publico den enseñansa, despues cu prensa a publica e noticia. E reunion a wordo yama pa dialuna 11 di mei 2026, pues dentro di e termino di 30 dia manera Reglamento di Orden ta stipula.
Aunque nos fraccion ta aprecia cu e reunion aki a wordo yama dentro di e termino di 30 dia, tin preocupacion serio pasobra otro peticionnan anterior pa reunion cu e mesun minister aki, ainda no a wordo atendi. E peticionnan ta trata di 4 di maart 2026, peticion pa debate riba integridad y transparencia, 6 di maart 2026, peticion pa debate riba vision di e minister tocante e Kabinete di Minister Plenipotenciario y Relacionnan den Reino, 14 di april 2026, debate riba su decision pa elimina Departamento di Mucha y Hoben.
Fraccion di MEP cu fecha di 30 april 2026, a pidi un splicacion di Presidente di Parlamento dicon e peticionnan anterior ainda no a wordo agenda, y ki tempo e tres reunionnan aki lo wordo convoca. Pero te awe e presidente no a contesta.
Mas principal e lider di fraccion a cuestiona: con nos mester mira e cos aki? Ta ken ta dicidi riba e agenda di Parlamento? Ta bira cu un minister por scoge na cual reunion e kier presenta y cual no? Pasobra e Reglemento di Orde di Parlamento no ta laga espacio pa e tipo di “pick and choose” asina.
“E situacion aki ta toca directamente e funcion di control di Parlamento y e principio di transparencia y bon gobernacion. Y nos fraccion kier sa si ta e ministernan ta “pick and choose” riba kico SI nan ta bin duna cuenta den Parlamento, y riba kico nan NO kier, y nos fraccion kier sa ta KEN ta determina e agenda di Parlamento”, Evelyn Wever-Croes a duna di conoce.
Durante henter e reunion, ni e minister, ni e presidente di Parlamento a duna contesta riba e preguntanan aki, lamentabelmente.
