Pareha turista cu stima Aruba un mundo a caba di cumpli 70 aña casa

ORANJESTAD (AAN): Nan a bisa claramente cu nan lugar favorito pa pasa vakantie ta Aruba! 

Y semper nan ta trece henter nan famia y amigonan hunto, y hasta ora di a celebra nan di 50 aniversario di boda na 2001, y tambe nan di 60 aniversario na 2011, nan a haci esey na forma grandi riba e isla aki.

   Pero awor debi na e pandemia, nan a caba di celebra e di 70 aniversario di boda na Staten Island, na New York mes.  Esey segun un relato cu a sali publica den prensa Mericano.  Y lo mas interesante ta con nan storia di amor a start como 72 aña pasa.  Nan a wordo poni riba un double-date pa sali hunto, pero ni Fred Cole, y tampoco Bernice Goloboy no a gusta e ‘pareha’ cu amigonan a match cu nan.

   Mas bien for di comienzo caba, Fred a gusta Bernice cu e anochi ey tabata saliendo cu un otro persona.  Y pa su suerte, Bernice tambe a haye mas cute.  E tempo ey Fred tabatin 18 aña, y Bernice tabatin 15.  Na final Fred a acerca Bernice y a bise cu e ta haye mas interesante compara cu e persona cu nan a pone bay riba date e anochi ey.

  Y di e tempo ey, nan a keda inseparable di otro y asina a start nan bida hunto.  Nan a cuminza un noviazgo di 2 aña y finalmente dia 18 di April 1951 nan a casa.  Na 1954 e pareha di Boston a cuminza biba na Staten Island, unda nan ta bibando ainda.  Nan a haya 3 yiu, y tabata bay cu nan riba vakantie.

   Ademas di goza di Florida Keys, tur aña nan tabata bishita Aruba.  E isla di Aruba a bira special, pasobra aki ta unda nan a festeha nan di 50 y di 60 aniversario cu henter nan famia.  Prensa Mericano a hasta publica potret di nan na Aruba na 2001 y tambe na 2011.

   Fred gusta hunga Tennis, como tambe di nabega riba boto y pasa dianan largo riba awa, y pesey gusta piscamento tambe.  Bernice gusta landamento y tambe bowling.  Pero lo principal nan gusta pasa tempo cu nan tres yiunan, y seis nietonan, y pronto lo haya nan prome tataranieto, na luna di Juli.

   Riba e potret por mira nan festehando nan di 70 aniversario, y tambe por mira potret di nan celebracion di Boda di 50 aña, y tambe Boda di 60 aña na Aruba.