ORANJESTAD (AAN): Diamars atardi, Sindicato FTA tambe a forma parti di stakeholders cu a haya algun minuut pa reuni cu Formador Evelyn Wever-Croes.
Hubert Dirksz kende ta president di FTA, riba pregunta di DIARIO a mustra cu dado momento Formador a haci un pregunta na nan, y esaki a hala nan atencion.
Esey ta e asunto di pago di Subsidio na Fundacionnan, cu ta un problema cu ta existi na momento cu a trata na cambia e forma pa duna subsidio, y cu a keda atende cune durante gobierno anterior. Pero awor e ta un punto di prioridad pa Formador pa esaki wordo atendi pa yega na un solucion pa e cantidad di Fundacion cu ta depende di subsidio.
Mientras tanto, Dirksz a papia tambe cu ainda tin algun compania na Aruba cu desde e pandemia a start ta pagando nan empleadonan sea 60 of 80 porciento di salario. El a bisa cu Sindicato FTA tin atencion pa esaki, y nan ta atende e asunto.
El a splica cu na comienzo di e pandemia, nan a acorda cu diferente compania, cu nan ta reduci horario di trabao, pero cu e condicion explicito, cu e momento cu e.o. ocupacion di Hotel ta demostra cu e ta bayendo bek halto (riba 65% of 70% di occupancy), cu e ora tur trahador tin di haya bek nan salario na 100 porciento.
Segun Dirksz, awor ya caba na Juli, e sector hotelero ta sintiendo e efecto positivo, pero e ta confirma cu hopi compania den comercio ainda ta den situacion dificil. Tin algun hotel ta trata na sconde tras di situacion dificil y no kier laga trahadornan haya salario ainda na 100 porciento, cu ta algo cu e ta lamenta.
