ORANJESTAD (AAN): E Sindicatonan SEPPA, TOPA, SIMAR, SPA, SADA y SINBA a diamars nan reunion cu Formador di Gobierno Evelyn Wever-Croes.
Representante di Sindicato di Douane, Eduard Maduro a duna di conoce cu durante e reunion a toca e tema di Landspakket unda lo bay trata puntonan cu ta concerni e empleadonan publico y a haya algun splicacion relaciona cu e proximo pasonan.
E sindicatonan a haci algun remarke y pregunta. E reunion a bay bon y den bon ambiente. Tambe a papia riba e rol di e formador di e gobierno nobo unda cu cada sindicato a trece nan puntonan y nan como sindicato di Douane sigur a trece tur nan puntonan di preocupacion cu tin riba mesa, a bisa.
Segun Maduro, den e ultimo añanan , Cuerpo di Douane no a pasa den bon experiencianan, pero nan a bisa Formador cu nan ta keda optimista cu den futuro e gobierno nobo lo trata Cuerpo di Douane den un diferente manera.
Tin hopi reto dilanti y hopi punto di atencion cu a keda riba mesa drumi pa algun aña cu no a wordo trata, a remarca.
A pidi Formador pa tene cuenta cu esaki y ta keda den spera di un proximo reunion ora cu e gobierno nobo forma oficialmente pa asina por sinta na mesa y sigui dialoga, Eduard Maduro a declara durante e conferencia di prensa cu tabata tin despues di e reunion cu Formador.
