E avion cu a baha na Aruba dos luna pasa...
ORANJESTAD (AAN): Cada tanto dia, mas detaye sorprendente ta sali for di paisnan na Sur America, unda e caso di e avion di carga Boeing 747-300M di Emtrasur ta sigui wordo investiga. No solamente na Argentina unda e avion keto bay ta den beslag y sospecha di ta meti den labamanto di placa, pero tambe na Paraguay ta investiga kico a pasa e dianan cu e avion tabata eynan, sperando di yena un cargamento di cigaria pa sali despues rumbo pa Aruba.
Siman pasa, un Ministro na Paraguay a divulga cu e tripulacion di e avion venezolano-irani, cu tabata na luna di Mei 2022 na e pais, a mantene contacto cu por lo menos dos stranhero, y un Paraguayo, kendenan ta wordo investiga pa caso di traficacion humano, y tambe di narcotrafico.
Ora cu e Boeing 747-300M aki di Emtrasur tabata den fin di siman di 13 di Mei 2022 na Ciudad del Este na Paraguay, a bin detecta cu e tripulantenan aki a drenta den contacto cu algun delincuente local cu ta wordo investiga pa traficacion humano internacional y tambe di narcotrafico. Esey ta loke Ministro Rene Fernandez a bisa, kende ta Ministro di Secretaria Nacional Anticorupcion (Senac).
E avion mes awor ta den beslag na Argentina, unda un comision consistiendo di Diputado- y Senadornan ta investigando posible labamento di placa y otro delito cu e vuelo aki.
E hendenan “local” cu e ta referi aki na dje, ta dos stranhero y un paraguayo, cu tin antecedente y procesonan personal keto bay activo na e pais.
E personanan aki tabatin contacto cu tur miembro di tripulacion di Emtrasur, y a confirma cu nan a informa Ministerio Publico di Paraguay di e acto aki. Sin cu el a duna detaye, el a bisa cu e hendenan aki a topa otro riba lugarnan publico, y a confirma si cu uno di nan a socede na Hotel, unda e 11 Venezolano y 7 Irani a drumi un anochi.
E avion di Emtrasur a yega Diabierna 13 di Mei 2022 na Aeropuerto Guarani na Ciudad del Este (Paraguay), y despues cu cargamento di cigaria a sali Dialuna 16 Mei marduga rumbo pa Aruba. Na Aruba e avion a baha, y ningun musca a bula.
Segun Ministro Fernandez, un di e aspectonan cu autoridadnan na Paraguay ta buscando pa haya sa, ta cu ki meta e ciudadanonan aki a yega den e zona di e pais. Pues di con e hendenan meti den traficacion humano, y narcotrafico a bay te na e Ciudad del Este (cerca di frontera cu Argentina y Brasil) pa topa cu esnan di Emtrasur.
Nan kier sa si acaso e hendenan aki ta envolvi den e operacion di exportacion di e cargamento di cigaria, of e tabatin otro meta su tras.
Autoridadnan na Paraguay ta hasta cuminza pensa, cu e operacion di ‘Carga’ di Emtrasur ta djis un tipo di ‘smokescreen’ y e berdadero motibo ta scondi un caminda. Prensa a puntra e Ministro si acaso e tripulantenan aki a baha na Ciudad del Este, y si acaso e weekend ey nan a cruza frontera y drenta Brasil. Pero e Ministro a bisa cu esey no a socede.
