Conocido presentadora di Chile ta promocionando Aruba bay goal cu potretnan

ORANJESTAD (AAN): E conocido animadora di TV na Chile, esta Raquel Argandoña tabata recien di bishita na Aruba,

y awor el a sorprende tur su fanaticonan cu un monton di potret pa mustra con bon su vacacion tabata na e paraiso aki den Caribe.

   El a hasta skirbi awor riba social media, cu e vacacion aki a pone sinti su mes asina liber, y a bisa: “E libertad ta oxigeno di alma”.

   E presentadora di show mainta na Chilevision, a cuminza pone riba Instagram diferente potret di su vacacion recien na Aruba.  El a pone un potret unda e ta pose feliz y cu su brazanan hisa, rond di pool di Marriott Aruba Resort, cu ta unda el a hospeda.

   Raquel Argandoña tabata luci den un bunita outfit, cu ta consisti di un sweater roos, un short hila, cu su boots blanco na pia, y un cartera chikito color blauw cla.

   “La libertad es el oxigeno del alma” ta loke el a pone bao di e potret aki.  Y den un rato, e presentadora aki cu tin 913.000 follower a cuminza duna comentario positivo riba esaki.  El a yega Aruba via di Copa Airlines.

   El a pone potret di dje riba beach, na restaurant cerca di lama, y a hasta bishita Renaissance Island.  Na final e tin un video graba riba El Faro Blanco net na bahada di solo.  Un total di como 13 posts riba Instagram dedica na Aruba.