Celebracion Dia di Brazil ‘Brasa bo Cultura’
ORANJESTAD (AAN): Bario di Brazil a briya den color y ritmo crioyo durante e 15 aniversario di Celebracion Dia di Brazil ‘Brasa bo Cultura’, organisa pa Fundacion Chico Harms. Diadomingo atardi, bou di higra di solo, 12 grupo cultural, mucha, hoben y adulto, bisti den trahe tipico y colorido, a duna bida na e Parada Folklore Cultural, mustrando asina nan orguyo, union y tradicion.
Apesar di e solo cayente, participantenan, bandanan tipico y esnan para na banda di caminda, a goza di cultura y tradicion. Tambe esnan na cas, por a disfruta di e Parada Folklore Cultural via medianan social.
Celebracion Dia di Brazil a demostra un biaha mas cu cultura ta e laso cu ta uni generacionnan y ta mantene e tradicionnan di Aruba bibo. “Brasa bo Cultura” ta simbolisa un brasa di herencia, un union di pueblo y e deseo pa mantene nos celebracionan cultural. Ora cu comunidad ta celebra hunto, nos ta florece hunto. Y esaki a keda demostra den e Parada Folklore Cultural diadomingo ultimo.
{gallery}Parada Folklore Cultural tawata bunita, colorido y cu un ambiente crioyo{/gallery}
