Segun Jayburtt Dijkhoff:
*E ta yama Uitvoeringsorgaan AZV!
ORANJESTAD (AAN) – Despues cu el a trece dilanti practicamente un denuncia, riba funcionamento di salud publico na Aruba, Jayburtt Dijkhoff a señala cu mas cu 400 miyon florin a wordo inverti den, entre otro, Hospital Dr. Horacio Oduber, pero no pa papia cu pashentnan unda esaki ta. “Pa hopi aña caba, Hospital a elimina e ‘Patient Raad’ y no a pone nada mas pa pashentnan tin un bos den e maneho di Hospital mes”. Dijkhoff a señala, y agrega cu Minister di Salud mester elabora tocante esaki y splica pueblo con esaki ta hinca den otro.
“Nos sa cu pashentnan na Aruba tin miedo pa entrega keho, y ora cu nos bay wak un instancia asina importante pa sostene e pashent, e ta wordo manda di cashi pa muraya y hasta no tin un base legal pa atende keho. Na di dos, e proceso pa tuma keho for di IVA. Mi ta puntra mi mes, abiertamente, si ta existi un Landsbesluit a base di articulo 17, si of no. Ami no por hay’e, y si ami no por hay’e, con pueblo lo hay’e anto? Y a base di kico ta pretende di yuda pashentnan, principalmente hende grandi cu tin hopi dificultad pa pone nan keho riba papel”, Dijkhoff a expresa.
E ta cuestiona cu IVA (Inspectie Volksgezondheid Aruba) ta existi pa siete aña y e tin gana di sa cuanto caso nan a atende den tur e siete añanan ey. “Mi ta pidi Minister pa saca e buki y mustra nos cuanto nan a soluciona tambe”, Jayburtt a señala.
E ta puntra su mes con ta bay atende tur e hendenan cu tin keho y no tin un caminda pa bay. Punto number 3 ta calidad di cuido y maneho di AZV. “Nos tin un AZV cu ta pretende di ta un departamento di maneho. No shonnan. E ta yama ‘Uitvoeringsorgaan AZV’. Esun cu tin cu elabora riba cual maneho nos tin cu sigui, ta Minister encarga cu Salubridad Publico. Sinembargo, bo no ta wak na ningun caminda, riba website e documentacion, kico ta e maneho di Minister y Ministernan, desde cu AZV a lanta, y esaki ta netamente importante pa derechonan di pashent. Pero AZV ta influencia si e derecho ta bira mas amplio of e ta wordo limita. P’esey ta importante si Minister por trece transparencia y publica e manehonan aki p’asina nos tur sa kico ta nos derechonan exactamente”, Dhr. Jayburtt Dijkhoff a señala.
